शिवप्रताप दिन 2022 : मुख्यमंत्री शिंदेंच्या उपस्थितीत किल्ले प्रतापगडावर ‘शिवप्रताप दिन’ उत्साहात साजरा, व्हिडीओ पहा….
पाचगणी (प्रतिनिधी) – छत्रपती शिवरायांच्या शौर्याची साक्ष देणारा शिवप्रताप दिन किल्ले प्रतापगडावर मुख्यमंत्री एकनाथ शिंदे यांच्या प्रमुख उपस्थितीत हजारो शिवप्रेमींच्या उपस्थिती उत्साहात पार पडला. मुख्यमंत्री एकनाथ शिंदे यांचे आगमन हेलिकॅाप्टरने किल्ले प्रतापगडाच्या पायथ्यालगत बनवण्यात आलेल्या हॅलिपॅडवर झाले . मुख्यमंत्री एकनाथ शिंदे, पर्यटनमंत्री मगंलप्रभात लोढा, उत्पादन शुल्क मंत्री तथा पालकमंत्री शंभूराज देसाई यांच्या प्रमुख उपस्थितीत किल्ले प्रतापगडाच्या ध्वज बुरुजावर भगव्या ध्वजाचे ध्वजारोहण करण्यात आले.
शिवकालीन धाडशी खेळाने व शिवमय वातावरणात मुख्यमंत्री एकनाथ शिंदे यांच्या उपस्थितीत किल्ले प्रतापगड ता. महाबळेश्वर येथे #शिवप्रताप दिन मोठया उत्साहात साजरा करण्यात आला. pic.twitter.com/WBv06WRXA6
— DISTRICT INFORMATION OFFICE, SATARA (@Info_Satara) November 30, 2022
किल्ले प्रतापगडावरील ध्वजबुरुजावरील ध्वजाच्या ध्वजारोहनानंतर मुख्यमंत्री एकनाथ शिंदे व पर्यटन मंत्री मंगल प्रभात लोढा यांच्या उपस्थितीत गडावरील भवानीमातेची पूजा करण्यात आली. यावेळी किल्ले प्रतापगडावर ‘जय भवानी जय शिवाजी’ च्या गर्जनानी आसमंत दुमदुमून गेला होता. फटाक्यांची आतशबाजी व पारंपरिक ढोल ताशांनी गडावरील माहोल आनंददायी झाला. किल्ले प्रतापगडावरील शिवस्मारकावर मुख्यमंत्री एकनाथ शिंदे यांच्या हस्ते श्रीफळ वाढवून हेलिकॅाप्टरमधून छत्रपती शिवरायांच्या अश्वारुढ पुतळ्यावर पुप्षवष्टी करण्यात आली.
भवानी मातेच्या मंदिरासमोरील ध्वजस्तंभाचे मान्यवरांच्या ह्रस्ते विधिवत पूजन करुन शिवशाहीचे प्रतिक असणाऱ्या भगव्या ध्वजाचे रोहण कुंभरोशीचे सरपंच कांचन सावंत यांच्या हस्ते करण्यात आले. त्यावेळी ढोल, तुताऱ्या, लेझीम यांच्या गजराने परिसर दुमदुमून गेला. त्यानंतर मानाच्या पालखीची मान्यवरांच्या हस्ते पूजा करण्यात आली. छत्रपतींची मूर्ती असलेल्या या पालखीची वाजत गाजत मिरवणूक सुरु झाली.
जिल्हाधिकारी, मुख्य कार्यकारी अधिकारी यांच्यासह सर्व उपस्थित मान्यवरांनी पालखी घेऊन मिरवणूक मार्गस्थ केली. जिल्हा परिषद प्राथमिक शाळा जावळी, वाडा कुंभरोशीच्या विद्यार्थी, विद्यार्थीनींचे लेझीम- तुताऱ्या, ढोल ताशा पथक, काठीवर चालणारी मुले, आई भवानी मातेचा व शिवरायांचा जयजयकार करणाऱ्या विद्यार्थ्यांच्या घेाषणांनी मिरवणूक मार्ग दुमदूमून गेला.
