प्रभात वृत्तसेवा तळेगाव ढमढेरे – गेल्या काही दशकांपासून मतभेदांच्या सावलीत विभागलेला तळेगाव ढमढेरे गाव आता पुन्हा एकतेच्या दिशेने वाटचाल करत आहे. आपापसातील दुरावा विसरून, गावाच्या विकासासाठी हातात हात घालण्याची तयारी ग्रामस्थांनी दाखवली आहे. गावकऱ्यांनी एकत्र येत गटाची एकता पुन्हा साधण्याचा निर्धार केला आहे. ‘एक गाव एक उमेदवार’ या संकल्पनेची पुन्हा चाहूल लागली आहे.तळेगाव ढमढेरे येथील भैरवनाथ मुळोबा मंदिरात आयोजित ‘एक गाव – एक उमेदवार’ बैठक रविवार, दि. २ रोजी उत्साहात पार पडली. गावातील सर्वपक्षीय पदाधिकारी, कार्यकर्ते आणि नागरिक मोठ्या संख्येने उपस्थित राहिल्याने ही बैठक लक्षवेधी ठरली. आगामी जिल्हा परिषद आणि पंचायत समिती निवडणुकीच्या पार्श्वभूमीवर गावात राजकीय समीकरणांची चर्चा रंगली.बैठकीत गावातून एकच उमेदवार देऊन विकासासाठी एकसंघपणे उभे राहण्याचा ठरविण्यात आले. पक्षभेद बाजूला ठेवून गावाच्या एकतेसाठी काम करण्याचे आवाहन गावातील सर्वपक्षीय पदाधिकारी यांनी केले. पदापेक्षा प्रतिष्ठेला प्राधान्य द्या.. दरम्यान, बैठकीत इच्छुक उमेदवार,तरुण कार्यकर्ते,पक्षीय पदाधिकारी यांनी आगामी निवडणुकीच्या पार्श्वभूमीवर मते मांडली . गावातील काही ज्येष्ठ नागरिकांनी “एकजूट ठेवा, पदापेक्षा प्रतिष्ठेला प्राधान्य द्या” असे मत मांडले. येत्या आठवड्यात गावात आणखी एक निर्णायक बैठक होणार असून, त्यात जिल्हा परिषद व पंचायत समिती उमेदवारावर अंतिम चर्चा होण्याची शक्यता आहे.
