Shirur Crime – सोशल मीडियावरून ओळख वाढवत एका अल्पवयीन तरुणीला प्रेमाच्या जाळ्यात अडकवून तिच्यावर वारंवार अत्याचार केल्याचा, लग्नाचे आमिष दाखवून फसवणूक केल्याचा तसेच धर्मांतरासाठी दबाव टाकल्याचा गंभीर आरोप समोर आला आहे. याप्रकरणी शिक्रापूर पोलीस ठाण्यात चार जणांविरुद्ध विविध गंभीर कलमांखाली गुन्हा दाखल करण्यात आला असून पुढील तपासासाठी हा गुन्हा पारगाव पोलिसांकडे वर्ग करण्यात आला आहे.

पीडित तरुणीची आरोपी साहील दगडू शेख (रा. ठिकेकरवाडी, ता. जुन्नर) याच्याशी इन्स्टाग्रामच्या माध्यमातून ओळख झाली होती. या ओळखीचे पुढे प्रेमसंबंधात रूपांतर झाले. ऑक्टोबर 2024 मध्ये आरोपीने तिला आंबेगाव तालुक्यातील वडगाव पीर परिसरात भेटण्यासाठी बोलावले. तेथे तिचे फोटो व व्हिडिओ काढून ते सोशल मीडियावर व्हायरल करण्याची धमकी देत तिच्यावर जबरदस्तीने लैंगिक अत्याचार केल्याचा आरोप फिर्यादीत करण्यात आला आहे.

त्यानंतर आरोपीने लग्नाचे आश्वासन देत तरुणीला वारंवार भेटण्यासाठी बोलावले. शिरूर परिसरातील निर्जन ठिकाणी तसेच जुन्नर तालुक्यातील त्याच्या राहत्या घरी नेऊन तिच्या इच्छेविरुद्ध शारीरिक संबंध ठेवल्याचे तक्रारीत नमूद करण्यात आले आहे. आरोपीने घरातील तलवार दाखवून धमकावल्याचाही आरोप आहे. दरम्यान, ऑक्टोबर 2025 मध्ये आरोपीने तरुणीला पारनेर तालुक्यातील म्हसे येथे तसेच इतर ठिकाणी नेले.

त्यावेळी त्याच्या नातेवाईकांकडून धर्मांतरासाठी दबाव टाकण्यात आल्याचा आरोप करण्यात आला आहे. पुढे जानेवारी 2026 मध्ये दिल्ली येथे नेऊन कथितरित्या विवाहाची प्रक्रिया पार पाडण्यात आली. मात्र त्यानंतर मुस्लिम धर्म स्वीकारून निकाह करण्यासाठी दबाव टाकण्यात आल्याचे फिर्यादीत म्हटले आहे.

तसेच आरोपीने तरुणीच्या घरातील सुमारे 25 ग्रॅम वजनाचे सोन्याचे मंगळसूत्र घेतल्याचा आरोप असून, त्याच्या कुटुंबीयांनीही धर्मांतरासाठी मानसिक व शारीरिक दबाव टाकल्याचे फिर्यादीने नमूद केले आहे. विरोध केल्यास फोटो व व्हिडिओ व्हायरल करून बदनामी करण्याच्या धमक्या दिल्याचाही आरोप करण्यात आला आहे.

या प्रकरणी साहील दगडू शेख, युनूस पठाण (पूर्ण नाव माहिती नाही), साहीलची आत्या व चुलती (नावे माहिती नाहीत) यांच्याविरुद्ध भारतीय न्याय संहिता कलम 64(2)(एम), 87, 305, 351(2)(3), 3(5) तसेच पोक्सो कायद्याच्या कलम 4 व 8 अन्वये गुन्हा दाखल करण्यात आला आहे. गुन्हा शिक्रापूर पोलिस ठाण्यात दाखल असून पुढील तपासासाठी तो पारगाव पोलिसांकडे वर्ग करण्यात आला आहे.