तळेगाव ढमढेरे : शिरूर तालुक्यातील मोठ्या लोकसंख्येच्या तळेगाव ढमढेरे येथील परिसरात घरफोडी, भुरट्या चोऱ्यांना ऊत आला आहे. शिक्रापूर पोलीस स्टेशनच्या हद्दीत कायदा, सुव्यवस्था राखण्यात पोलीस प्रशासन अपयश ठरल्याची संतप्त प्रतिक्रिया उमटत आहे. त्यामुळे पोलिसांच्या कर्तव्यावर प्रश्नचिन्हाचे मळभ दाटले आहेत. गावात ग्रामसुरक्षा यंत्रणेचा कॉल बंद असल्याने चोरीसारख्या आपत्कालीन घटनांची माहिती मिळाली नसल्याची बाब घटनेनंतर समोर आली आहे. दरम्यान, चोरीच्या घटना रोखण्याची मागणी होत आहे. ग्रामीण पोलीस अधीक्षक संदीपसिंह गिल यांना नागरिक निवेदन देण्याच्या तयारीत असल्याचे समजते. गावातील ग्रामसुरक्षा यंत्रणेचा कॉल बंद आहे. आपत्कालीन घटनांची माहिती नागरिकांना तातडीने मिळत नाही. हे घटनेनंतर समोर आले आहे. चोरी सुरू असताना नागरिकांना एकमेकांना माहिती देण्यासाठी ग्रामसुरक्षा यंत्रणा कार्यरत असती तर नागरिकांना त्वरित सतर्क करता आले असते, अशी भावना ग्रामस्थांनी व्यक्त केली. त्यामुळे ग्रामसुरक्षा यंत्रणा तातडीने सुरू करून ती प्रभावीपणे कार्यान्वित करावी, अशी आक्रमक मागणी नागरिकांकडून करण्यात येत आहे. पथदिवे व सीसीटीव्ही दुरुस्तीची मागणी गावातील बाजार मैदान, बाजारपेठ तसेच विविध वाड्यावस्त्यांवरील मुख्य रस्त्यांवर पथदिव्यांची व्यवस्था केलेली आहे. सुरक्षेच्या दृष्टीने गावात अनेक ठिकाणी सीसीटीव्ही कॅमेरेही बसविले आहेत. मात्र, काही ठिकाणी वायरिंगच्या समस्येमुळे अनेक सीसीटीव्ही कॅमेरे बंद अवस्थेत असल्याचे निदर्शनास आले आहे. त्यामुळे चोरीसारख्या घटनांच्या तपासात अडचणी निर्माण होत असल्याची भावना नागरिकांनी व्यक्त केली. सध्या चोरीच्या घटनांच्या पार्श्वभूमीवर बंद असलेले सीसीटीव्ही कॅमेरे तातडीने दुरुस्त करून सुरू करावेत, ज्या भागांमध्ये अद्याप कॅमेरे नाहीत. त्या ठिकाणी नवीन सीसीटीव्ही बसवावेत, अशी मागणी होत आहे. रात्रीच्या वेळी काही भागांमध्ये पथदिवे बंद असल्याने चोरीचे प्रकार वाढत असून सुरक्षेच्या दृष्टीने पथदिव्यांची नियमित देखभाल करावी, अशी नागरिकांनी केली आहे. सुरक्षेपेक्षा बिदागीत जीव गुंतला शिक्रापूर पोलीस ठाण्याच्या हद्दीत तळेगाव ढमढेरे, कोरेगाव भीमा, सणसवाडी ही मोठी गावे आहेत. या परिसरात कायदा सुव्यवस्थेची ऐशी की तैशी आहे. नेहमीच गुन्ह्यांचा आलेख उंचावणारा आहे. त्यात कागदोपत्री कारवाईचा फार्स आवळला जातो. मात्र, झारीतील छोटे मासे कारवाईपुरते अडकवले जातात. आणि मोठे मासे गळाला लावले जात नाही, अशी संतप्त प्रतिक्रिया उमटत आहे. तळेगाव ढमढेरे परिसरात घडलेल्या चोरीच्या घटनांमुळे नागरिकांनी घाबरून न जाता अधिक सतर्क राहणे गरजेचे आहे. रात्रीच्या वेळी घराबाहेर अनोळखी व्यक्ती किंवा संशयास्पद हालचाली आढळल्यास नागरिकांनी तात्काळ 112 क्रमांकावर संपर्क साधावा. गावातील प्रत्येक नागरिकाने आपल्या परिसरावर लक्ष ठेवून पोलीस प्रशासनाला सहकार्य करणे आवश्यक आहे. – पांडुरंग नरके, पोलीस पाटील, तळेगाव ढमढेरे. हेही वाचा : Pune District : राज्य पातळीवर ठसा उमटविण्याचा इंदापूर नगरपरिषदेचा संकल्प
