प्रभात वृत्तसेवा वढू बुद्रुक – वढू बुद्रुक (ता. शिरूर) परिसरात चोरट्यांनी एकाच रात्री तीन दुकाने फोडल्याची घटना उघडकीस आली आहे. महादेव स्वीट होम, महालक्ष्मी हार्डवेअर आणि कोठावडे किराणा स्टोअर या दुकानांचे शटर उचकटून चोरट्यांनी रोख रक्कम व देवघरातील चांदीची मूर्ती चोरली. या घटनेमुळे स्थानिक व्यवसायिकांमध्ये भीती पसरली असून शिक्रापूर पोलिसांनी अज्ञात चोरट्यांविरुद्ध गुन्हा दाखल केला आहे. मिळालेली माहिती अशी की, वढू बुद्रुक येथील व्यवसायिक नेहमीप्रमाणे रात्री आपली दुकाने बंद करून घरी गेले होते. सकाळी जेव्हा दुकानदार दुकाने उघडण्यासाठी आले, तेव्हा त्यांना दुकानांचे शटर उचकटल्याचे दिसले. दुकानांची पाहणी केली असता, गल्ल्यातील रोख रक्कम आणि एका दुकानातील चांदीची मूर्ती चोरून नेल्याचे निदर्शनास आले. या प्रकरणी शुभम बापू भंडारे (वय २५, रा. वढू बुद्रुक) यांनी शिक्रापूर पोलीस ठाण्यात फिर्याद दिली आहे. त्यांच्या फिर्यादीवरून पोलिसांनी अज्ञात आरोपींविरुद्ध गुन्हा नोंदवला आहे. चोरीच्या या घटनेनंतर परिसरात रात्रीची गस्त वाढवण्याची मागणी ग्रामस्थांकडून होत आहे. पोलीस हवालदार विकास सरोदे या प्रकरणाचा अधिक तपास करत असून परिसरातील सीसीटीव्ही फुटेजची तपासणी केली जात आहे.
