Shikrapur Crime – तळेगाव ढमढेरे येथून कोरेगाव भीमा येथे मुलीकडे जाण्यासाठी बसने प्रवास करणाऱ्या एका वृद्ध महिलेचे सोन्याचे मंगळसूत्र चोरट्या महिलांनी शिताफीने लांबवल्याची घटना समोर आली आहे. याप्रकरणी दोन अज्ञात महिलांविरोधात शिक्रापूर पोलिसात गुन्हा दाखल करण्यात आला आहे. मिळालेल्या माहितीनुसार, शिवतक्रार म्हाळुंगी येथील रहिवासी असलेल्या कुसुम पोपट भोसले (वय ७०) या बसमधून प्रवास करत होत्या. प्रवासादरम्यान त्यांनी त्यांचे एक तोळ्याचे सोन्याचे मंगळसूत्र काढून आपल्याजवळील पिशवीत ठेवले होते. बसमध्ये गर्दी असताना दोन अनोळखी महिला त्यांच्या जवळ येऊन जबरदस्तीने बसल्या. त्यापैकी एका महिलेने कुसुम यांच्या मांडीवर लहान मुलगी बसवली, तर दुसरीने त्यांच्या पिशवीवर हात ठेवला. भोसले यांनी त्या महिलांना बाजूला करण्याचा प्रयत्न केला, मात्र त्या तशाच बसून राहिल्या.काही वेळात कोरेगाव भीमा बस स्थानकावर भोसले उतरल्या असता, त्यांनी पिशवी तपासली. त्यावेळी पिशवीत ठेवलेले एक तोळ्याचे मंगळसूत्र गायब असल्याचे त्यांच्या लक्षात आले. आपली फसवणूक झाल्याचे समजताच त्यांनी तात्काळ शिक्रापूर पोलीस ठाणे गाठले.
