ढाका : बांगलादेशच्या पदच्युत पंतप्रधान शेख हसीना यांच्यासह १२ जणांविरुद्ध रेड नोटीस जारी करण्याची विनंती बांगलादेश पोलिसांच्या राष्ट्रीय केंद्रीय ब्युरोने इंटरपोलला केली आहे. हसीना गेल्या वर्षी ५ ऑगस्टपासून भारतात राहत आहेत. विद्यार्थ्यांच्या नेतृत्वाखालील मोठ्या आंदोलनानंतर त्या बांगलादेशातून पळून गेल्या होत्या आणि या आंदोलनामुळे अवामी लीगचे १६ वर्षांचे सरकार पडले होते.

एनसीबी न्यायालय, सरकारी वकील किंवा तपास संस्थांकडून आलेल्या अपिलांच्या आधारे अशी मागणी करण्यात आल्यानंतर त्यावर प्रक्रिया केली जाते, असे सहाय्यक महानिरीक्षक एनामुल हक सागोर यांनी म्हटले आहे. तपासादरम्यान किंवा चालू असलेल्या खटल्याच्या कार्यवाहीत उद्भवणाऱ्या आरोपांच्या संदर्भात असे अर्ज दाखल केले जातात, असेही त्यांनी सांगितले.

फरार असलेल्या आरोपीचा जगभरातला ठावठिकाणा शोधण्यासाठी, प्रतिबंधात्मक अटक, प्रत्यार्पण आणि तस्सम कायदेशीर कारवाईसाठी इंटरपोलच्या रेड कॉर्नर नोटीसीचा वापर केला जातो. या आरोपीचा ठावठिकाणा समजला कि नंतर त्याची माहिती संबंधित तपास संस्थेला देण्यात येते. बांगलादेशमध्ये मुहम्मद युनूस यांच्या नेतृत्वाखालील हंगामी सरकार सत्तेवर आल्यापासून हसीना आणि त्यांच्याशी संबंधित असलेल्या काही जणांविरोधात अटक वॉरंट बजावण्यात आले आहे. ढाका येथील आंतरराष्ट्रीय गुन्हे न्यायाधिकरणाच्या मुख्य सरकारी वकिलांच्या कार्यालयाने गेल्या वर्षी नोव्हेंबरमध्ये पोलिस मुख्यालयाला शेख हसीना आणि इतर फरार आरोपींना अटक करण्यासाठी इंटरपोलची मदत घेण्याची औपचारिक विनंती केली होती.