नेवासे : महाराष्ट्र शासनाच्या शालेय शिक्षण व क्रिडा विभागातर्फे देण्यात येणारा क्रांतीज्योती सावित्रीमाई फुले राज्य शिक्षक गुणगौरव पुरस्कार 2024-25 हा अहमदनगर जिल्ह्यातील नेवासे तालुक्यातील जिल्हा परिषद शाळा, भालगाव येथील उपक्रमशील शिक्षिका शितल झरेकर-आठरे यांना प्रदान करण्यात आला. मुंबईतील एनसीपीएच्या टाटा थिएटरमध्ये उपमुख्यमंत्री अजित पवार यांच्या हस्ते हा पुरस्कार देण्यात आला.

यावेळी विधानसभा अध्यक्ष ॲड. राहुल नार्वेकर, शालेय शिक्षणमंत्री दादा भुसे, राज्यमंत्री डॉ. पंकज भोयर, मुंबई सह पालकमंत्री मंगलप्रभात लोढा, विधान परिषद सदस्य ज. मो. अभ्यंकर, आमदार ज्ञानेश्वर म्हात्रे, डॉ. मनीषा कायंदे, शालेय शिक्षण प्रधान सचिव रणजीतसिंह देओल, शिक्षण आयुक्त सचिंद्रप्रताप सिंह आणि शिक्षण संचालक महेश पालकर उपस्थित होते.

उपमुख्यमंत्री अजित पवार यांनी शिक्षकांना राष्ट्रनिर्मितीचे ब्रँड ॲम्बेसेडर संबोधत कौशल्याधारित शिक्षणावर भर देण्याचे आवाहन केले. मुख्यमंत्री देवेंद्र फडणवीस यांनी दृश्य प्रणालीद्वारे, तर उपमुख्यमंत्री एकनाथ शिंदे यांनी शुभेच्छा संदेशाद्वारे शिक्षकांचे कौतुक केले. या कार्यक्रमात राज्यातील 111 शिक्षकांचा सन्मान झाला.

अनाथ विद्यार्थ्यांसाठी पुरस्कार रक्कम –
शितल झरेकर-आठरे यांनी पुरस्काराची 1 लाख 10 हजार रुपये रक्कम अनाथ व गरजवंत विद्यार्थ्यांच्या शैक्षणिक साहित्यासाठी देण्याची घोषणा केली आहे.