Juhi Chawla : ८० आणि ९० च्या दशकात आपल्या सौंदर्य, अभिनय आणि मोहक व्यक्तिमत्त्वाने प्रेक्षकांच्या मनावर अधिराज्य गाजवणारी अभिनेत्री म्हणजे जुही चावला. बॉलिवूडमध्ये यशाच्या सर्वोच्च शिखरावर असताना अचानक अभिनेत्रीने एक मोठा निर्णय घेत चाहत्यांना आश्चर्याचा धक्का दिला होता.

जुही चावलाने १९८६ मध्ये ‘सुलतानत’ या चित्रपटातून बॉलिवूडमध्ये पदार्पण केले. पण तिला १९८८ मध्ये प्रदर्शित झालेल्या ‘कयामत से कयामत तक’ चित्रपटाने ओळख मिळवून दिली. हा चित्रपट सुपरहिट ठरला आणि जुही रातोरात स्टार बनली. त्यानंतर तिला एकामागून एक चित्रपटांच्या अॅाफर्स मिळाल्या. ९० च्या दशकात ती हिंदी चित्रपटसृष्टीतील आघाडीच्या अभिनेत्रींपैकी एक बनली.

करिअरच्या भरभराटीच्या काळात १९९५ मध्ये जुहीने उद्योगपती जय मेहता यांच्याशी विवाह केला. जय मेहता हे तिच्यापेक्षा सात वर्षांनी मोठे आहेत. मात्र, त्या काळात अभिनेत्रींच्या लग्नाचा त्यांच्या करिअरवर परिणाम होतो, अशी धारणा होती. त्यामुळे लग्नाची बातमी सार्वजनिक झाल्यास चित्रपटांच्या संधी कमी होतील आणि करिअरला फटका बसेल, अशी भीती जुहीला वाटत होती. त्यामुळे तिने आपले लग्न अनेक वर्षे गुप्त ठेवले होते.

हेही वाचा : Hero Moto Corp: हिरो मोटोकॉर्पची मोठी झेप! इथेनॉलवर धावणारी पहिली फ्लेक्स-फ्यूल बाईक आज लॉन्च

एका मुलाखतीत जुहीने लग्न का गुप्त ठेवले होते याविषयी भाष्य केले होते. २०२० मध्ये दिलेल्या मुलाखतीत अभिनेत्रीने सांगितले होते की, “माझ्या करिअरला नुकतीच गती मिळाली होती आणि मी चांगले काम करत होते. त्याचवेळी जय माझ्या आयुष्यात आले. लग्नामुळे करिअर थांबेल अशी भीती होती, त्यामुळे मी दोन्ही गोष्टी सांभाळण्याचा मार्ग निवडला.”

सध्या जुही चावला चित्रपटांपासून काहीशी दूर असली तरी संपत्तीच्या बाबतीत ती अनेक अभिनेत्रींपेक्षा खूप पुढे आहे. हुरुन रिच लिस्टनुसार, तिची एकूण संपत्ती सुमारे ७,७९० कोटी रुपये आहे. इंडियन प्रीमियर लीगमधील कोलकाता नाईट रायडर्स संघाची ती सहमालक असून, या व्यवसायातून तिला मोठे उत्पन्न मिळते. त्यामुळे जुही चावलाचा भारतातील सर्वात श्रीमंत अभिनेत्रींच्या यादीत समावेश होतो.

हेही वाचा : Breaking News : मुंबईत महाविकास आघाडीचे महागाईविरोधी आंदोलन; सुप्रिया सुळे, रोहित पवारांसह जितेंद्र आव्हाड पोलिसांच्या ताब्यात