कोलकता : सोशल मीडियावर आपल्या टिप्पण्यांद्वारे धार्मिक भावना दुखावल्याच्या आरोपाखाली अटक करण्यात आलेली, पुण्याची कायद्याची विद्यार्थिनी शर्मिष्ठा पानोली हिला अंतरिम दिलासा देण्यास कलकत्ता उच्च न्यायालयाने नकार दिला. न्यायालयाने म्हटले की, अभिव्यक्ती स्वातंत्र्याचा अर्थ असा नाही की, तुम्ही इतरांच्या भावना दुखावता. न्यायालयाने राज्य सरकारला ५ जून रोजी होणाऱ्या पुढील सुनावणीत केस डायरी सादर करण्याचे निर्देश दिले.

कायद्याची विद्यार्थिनी शर्मिष्ठा पानोली यांनी कलकत्ता उच्च न्यायालयात ट्रायल कोर्टाने दिलेल्या रिमांड ऑर्डरला आव्हान देणारी याचिका दाखल केली होती. याचिकेवर सुनावणी करताना न्या. पार्थ सारथी चॅटर्जी म्हणाले की, आम्हाला ऐकले आहे की, हा व्हिडिओ सोशल मीडियावर बनवण्यात आला आहे. आम्हाला अभिव्यक्ती स्वातंत्र्य आहे, परंतु याचा अर्थ असा नाही की, तुम्हाला इतर धर्मांच्या भावना दुखावण्यची परवानगी असेल. आपला देश विविधतेने भरलेला आहे आणि येथील सर्व लोक वेगवेगळ्या जाती आणि धर्माचे आहेत. हे सांगताना आपण काळजी घेतली पाहिजे.

कोलकत्याच्या गार्डन रीच पोलिस स्टेशनमधील पानोलीच्या अटकेशी संबंधित प्रकरणाची चौकशी करण्याचे निर्देश खंडपीठाने दिले. इतर सर्व प्रकरणांवरील कार्यवाही पुढील आदेशापर्यंत स्थगित राहील. पानोलीच्या कथित कृतीवर पुढील कोणताही गुन्हा नोंदवला जाणार नाही, याची खात्री राज्य सरकार करेल. न्यायालयाने या प्रकरणाची पुढील सुनावणी ५ जून रोजी निश्चित केली आहे.

सुनावणीदरम्यान, शर्मिष्ठाच्या वकिलाने सांगितले की, तिची अटक बेकायदेशीर आहे. कारण एफआयआरमध्ये नमूद केलेले सर्व गुन्हे अदखलपात्र होते. अटकेपूर्वी तिला कोणतीही सूचना देण्यात आली नव्हती. तर नवीन कायद्यानुसार हे आवश्यक आहे. पानोलीच्या कुटुंबानेही पोलिसांकडे तक्रार केली होती की, ती धोक्यात आहे आणि ७ मे च्या रात्री पोस्ट केल्यानंतर ८ मे रोजी सोशल मीडियावरून कथित आक्षेपार्ह पोस्ट काढून टाकण्यात आली. त्यांनी पानोलीविरुद्ध नोंदवलेला एफआयआर रद्द करण्याची विनंती केली आणि त्याच्या जामिनाची मागणी केली.

यावर, राज्य सरकारच्या वकिलाने सांगितले की, आधीच नोटीस बजावण्यात आली होती. परंतु पानोली आणि त्याचे कुटुंब गुरुग्रामला पळून गेले होते. यामुळे कायदेशीर नोटीस बजावण्याचे अनेक प्रयत्न अयशस्वी झाले. यानंतर, न्यायालयाने अटक वॉरंट देखील जारी केले, ज्याच्या आधारे तिला गुरुग्राममधून अटक करण्यात आली. या प्रकरणाची योग्य चौकशी करण्यात आली आणि या संदर्भात कायदेशीर प्रक्रियांचे पालन करण्यात आले.

कोलकाता पोलिसांनी शुक्रवारी रात्री जातीय टिप्पणी असलेला व्हिडिओ अपलोड केल्याच्या आरोपाखाली हरियाणातील गुरुग्राम येथून शर्मिष्ठा पानोलीला अटक केली. व्हिडिओमध्ये म्हटले आहे की, बॉलीवूड अभिनेते ऑपरेशन सिंदूरवर मौन बाळगत आहे. शनिवारी, कोलकाता न्यायालयाने पानोलीला १३ जूनपर्यंत न्यायालयीन कोठडी सुनावली. या वादा नंतर पानोलीने सोशल मीडियावर बिनशर्त माफी मागितली आणि तिचे व्हिडिओ आणि पोस्ट काढून टाकले.