कोलकता : सोशल मीडियावर वादग्रस्त टिप्पण्यांसह व्हिडिओ पोस्ट केल्याबद्दल अटक करण्यात आलेल्या इन्फ्ल्युएन्सर शर्मिष्ठा पानोलीला कलकत्ता उच्च न्यायालयाने अंतरिम जामीन मंजूर केला आहे. न्यायालयाने पानोली हिला १०,००० रुपयांचे जामीनपत्र भरण्याचे निर्देश दिले आहेत. पुण्यातील कायद्याची विद्यार्थिनी असलेल्या शर्मिष्ठा पानोलीने यापूर्वी सोशल मीडियावर तिच्या वादग्रस्त वक्तव्यांशी संबंधित व्हिडिओ अपलोड केल्याबद्दल अटक करण्यात आली होती. तिच्यावर धार्मिक भावना दुखावल्याचा आरोप आहे. आधी उच्च न्यायालयाने गेल्या सुनावणीत पानोलीला अंतरिम दिलासा देण्यास नकार दिला होता. कायद्याची विद्यार्थिनी शर्मिष्ठा पानोलीने ट्रायल कोर्टाने दिलेल्या कोठडी आदेशाला आव्हान देणारी याचिका कोलकाता उच्च न्यायालयात दाखल केली होती. याचिकेवर सुनावणी करताना न्या. पार्थ सारथी चॅटर्जी म्हणाले की, व्हिडिओ सोशल मीडियावर बनवण्यात आला आहे, असे आम्ही ऐकले आहे. अभिव्यक्ती स्वातंत्र्य आहे, परंतु याचा अर्थ असा नाही की तुम्ही इतरांच्या भावना दुखावाव्यात. आपला देश विविधतेने भरलेला आहे आणि येथील सर्व लोक वेगवेगळ्या जाती आणि धर्माचे आहेत. काहीही बोलताना आपण याची काळजी घेतली पाहिजे. खंडपीठाने या प्रकरणाची चौकशी करण्याचे निर्देश दिले. इतर सर्व प्रकरणांवरील कार्यवाही पुढील आदेशापर्यंत स्थगित ठेवण्यात येईल. पानोलीच्या कथित कृतीवर पुढील कोणताही गुन्हा नोंदवला जाणार नाही याची खात्री राज्य करेल. शर्मिष्ठाच्या वकिलाचा दावा सुनावणीदरम्यान, शर्मिष्ठाच्या वकिलाने म्हटले होते की तिची अटक बेकायदेशीर आहे, कारण एफआयआरमध्ये नमूद केलेले सर्व गुन्हे अदखलपात्र आहेत. अटकेपूर्वी तिला कोणतीही सूचना देण्यात आली नव्हती. नवीन कायद्यानुसार ते आवश्यक आहे. पानोलीच्या कुटुंबानेही पोलिसांकडे तक्रार केली होती की, तिच्या जीवाला धोका आहे. ७ मे रोजी रात्री पोस्ट केल्यानंतर कथित आक्षेपार्ह पोस्ट ८ मे रोजी सोशल मीडियावरून काढून टाकण्यात आली. त्यांनी पानोलीविरुद्ध नोंदवलेला एफआयआर रद्द करण्याची विनंती केली आणि तिच्यासाठी जामीन मागितला होता.
