Stock Market Crash: भारतीय शेअर बाजारात मंगळवारी (२४ फेब्रुवारी) मोठी घसरण नोंदवली गेली. माहिती-तंत्रज्ञान (IT) क्षेत्रातील समभागांमध्ये मोठ्या प्रमाणात विक्री आणि जागतिक बाजारांतील नकारात्मक संकेतांमुळे बाजार चौफेर कोसळला. अमेरिकेचे राष्ट्राध्यक्ष डोनाल्ड ट्रम्प यांनी आयात शुल्काबाबत (Tariff) केलेल्या नव्या वक्तव्यामुळे गुंतवणूकदारांच्या भावना खालावल्या. व्यवहाराच्या अखेरीस बीएसई सेन्सेक्स १,०६८.७४ अंक म्हणजेच १.२८ टक्क्यांनी घसरून ८२,२२५.९२ वर बंद झाला. तर निफ्टी २८८.३५ अंक म्हणजेच १.१२ टक्क्यांनी खाली येत २५,४२४.६५ च्या पातळीवर स्थिरावला. सोमवारी सलग दुसऱ्या दिवशी तेजीत बंद झालेल्या बाजाराला मंगळवारी जोरदार ब्रेक बसला. गुंतवणूकदारांचे ₹१.९६ लाख कोटी बुडाले – बीएसईवर नोंदणीकृत कंपन्यांचे एकूण बाजार भांडवल आज ४६५.८१ लाख कोटी रुपयांवर आले, जे मागील व्यवहार दिवशी ४६९.१९ लाख कोटी रुपये होते. त्यामुळे एकाच दिवसात गुंतवणूकदारांच्या संपत्तीत सुमारे १.९६ लाख कोटी रुपयांची घट झाली. IT क्षेत्राला सर्वाधिक फटका – क्षेत्रीय निर्देशांकांमध्ये IT निर्देशांक सर्वाधिक प्रभावित झाला असून तो ४ टक्क्यांहून अधिक घसरला. रिअल्टी निर्देशांकही २ टक्क्यांहून अधिक खाली आला. मात्र मेटल, फार्मा, पीएसयू बँक, ऑइल अँड गॅस आणि एनर्जी क्षेत्रे ०.३ ते १ टक्क्यांपर्यंत तेजीत राहिली. मिडकॅप निर्देशांक ०.३ टक्के, तर स्मॉलकॅप निर्देशांक ०.५५ टक्क्यांनी घसरला. stock market सेन्सेक्सचे टॉप लूजर आणि गेनर – सेन्सेक्सच्या ३० पैकी २२ समभाग लाल निशाणात बंद झाले. टेक महिंद्रा ६.६० टक्क्यांसह सर्वाधिक घसरणारा समभाग ठरला. एचसीएल टेक, इटर्नल, इन्फोसिस आणि टीसीएस यांच्या समभागांमध्ये ३.७९ ते ६.१० टक्क्यांपर्यंत घसरण झाली. तेजीत राहिलेल्या ८ समभागांमध्ये एनटीपीसीने १.९४ टक्क्यांसह आघाडी घेतली. त्यापाठोपाठ हिंदुस्तान युनिलिव्हर, टाटा स्टील, पॉवरग्रिड आणि टायटन ०.२४ ते ०.६२ टक्क्यांपर्यंत वधारले. बीएसईवर आज एकूण ४,३६७ समभागांचे व्यवहार झाले, त्यापैकी १,४२२ समभाग तेजीत, तर २,८०२ समभाग घसरणीत बंद झाले. १४३ समभाग स्थिर राहिले. ९१ समभागांनी नवा ५२ आठवड्यांचा उच्चांक, तर ३५७ समभागांनी नवा ५२ आठवड्यांचा नीचांक गाठला. हेही वाचा – केरळचे नाव आता ‘केरळम’; केंद्रीय मंत्रिमंडळाची मंजुरी शेअर बाजार का कोसळला? जाणून घ्या पाच प्रमुख कारणे IT शेअर्समध्ये मोठी विक्री – आज सर्वाधिक फटका IT क्षेत्राला बसला. याचे कारण म्हणजे अमेरिकेतील ‘अँथ्रोपिक’ या कंपनीने दावा केला की तिचे ‘क्लॉड कोड’ हे AI साधन जुन्या सॉफ्टवेअर प्रणाली अद्ययावत करण्याचे काम खूपच स्वस्त आणि सोपे करू शकते. त्यामुळे टीसीएस, इन्फोसिस यांसारख्या पारंपरिक IT कंपन्यांच्या व्यवसायावर परिणाम होण्याची भीती निर्माण झाली आणि निफ्टी IT निर्देशांक सकाळीच ३ टक्क्यांनी घसरला. रुपया कमकुवत झाला – मंगळवारी रुपया ७ पैशांनी घसरून ९०.९६ प्रति डॉलर इतका खाली आला. कच्च्या तेलाच्या वाढत्या किमती आणि मजबूत डॉलरमुळे रुपयावर दबाव आला. परकीय संस्थात्मक गुंतवणूकदारांनी (FII) खरेदी केल्यामुळे घसरण थोडी कमी राहिली, मात्र रुपया दबावाखालीच राहिला. जागतिक बाजारांचे नकारात्मक संकेत – आशियातील बहुतांश बाजार आज मंदावले होते. अमेरिकेतील वॉल स्ट्रीटही रात्री घसरणीत बंद झाला होता. राष्ट्राध्यक्ष डोनाल्ड ट्रम्प यांनी व्यापार करारांबाबत कडक भूमिका घेत अधिक आयात शुल्क लादण्याचे संकेत दिले. त्यामुळे जगभरातील गुंतवणूकदारांमध्ये अनिश्चितता पसरली आणि भारतीय बाजारावरही त्याचा परिणाम झाला. कच्च्या तेलाचे दर वाढले – आंतरराष्ट्रीय बाजारात ब्रेंट क्रूडचा भाव १ टक्क्याने वाढून ७२.१३ डॉलर प्रति बॅरलवर पोहोचला. भारत मोठ्या प्रमाणात कच्चे तेल आयात करतो, त्यामुळे दरवाढ म्हणजे व्यापार तूट वाढणे आणि महागाई वाढण्याची शक्यता. यामुळे गुंतवणूकदारांचा विश्वास डळमळीत झाला. निफ्टीची साप्ताहिक एक्सपायरी – मंगळवारी निफ्टी डेरिव्हेटिव्ह कॉन्ट्रॅक्ट्सची साप्ताहिक एक्सपायरी होती. एक्सपायरीच्या दिवशी व्यापारी आपल्या फ्युचर्स आणि ऑप्शन्स सौद्यांची उलाढाल करतात, ज्यामुळे बाजारात नेहमीपेक्षा जास्त चढउतार होतात. आजच्या घसरणीला यानेही हातभार लावला. पुढे काय होणार? जिओजित इन्व्हेस्टमेंट्सचे मुख्य बाजार विश्लेषक आनंद जेम्स यांच्या मते, निफ्टी सध्या २५,३०० ते २५,८४० या टप्प्यात राहण्याची शक्यता आहे. बाजार अद्याप पूर्णपणे मंदीचे संकेत देत नसला तरी गुंतवणूकदारांनी सावधगिरी बाळगणे आवश्यक असल्याचे त्यांनी सांगितले.