मुंबई: भारतीय शेअर बाजारात मंगळवार, ११ नोव्हेंबर रोजी सलग दुसऱ्या दिवशी तेजीचे वातावरण पाहायला मिळाले. दिवसाची सुरुवात कमकुवत झाली होती आणि सुरुवातीच्या व्यवहारात सेन्सेक्स सुमारे ४०० अंकांनी गडगडला होता. मात्र, मजबूत जागतिक संकेत आणि अमेरिकेसोबतच्या व्यापार कराराच्या वाढलेल्या अपेक्षांमुळे दुपारनंतर बाजारात मोठी रिकव्हरी (Recover) दिसून आली. दिवसअखेर, मुंबई शेअर बाजाराचा सेन्सेक्स (Sensex) ३३५.९७ अंकांनी, म्हणजेच ०.४० टक्क्यांनी वाढून ८३,८७१.३२ च्या पातळीवर बंद झाला. दुसरीकडे, निफ्टी (Nifty), जो सुरुवातीला २५,४५० च्या खाली घसरला होता, तो १३१.२५ अंकांनी, म्हणजेच ०.५१ टक्क्यांनी चढून २५,७०५.६० च्या स्तरावर स्थिरावला. या तेजीमुळे गुंतवणूकदारांच्या संपत्तीत मोठी वाढ झाली. बीएसईवर सूचीबद्ध कंपन्यांचे एकूण बाजार भांडवल (Market Capitalization) मागील दिवसाच्या ४६८.२० लाख कोटी रुपयांवरून वाढून ४६८.९४ लाख कोटी रुपयांवर पोहोचले. याचा अर्थ, गुंतवणूकदारांनी एकाच दिवसात सुमारे ७४,००० कोटी रुपये कमावले. सेक्टोरल कामगिरी: आयटी आणि ऑटो क्षेत्रात सर्वाधिक तेजी आजच्या व्यवहारात सेक्टोरल इंडेक्समध्ये (Sectoral Index) संमिश्र कल दिसून आला. आयटी (IT), टेलिकॉम, ऑटो (Auto) आणि कॅपिटल गुड्स (Capital Goods) क्षेत्रातील समभागांमध्ये सर्वाधिक वाढ नोंदवली गेली. याउलट, फायनान्शियल सर्व्हिसेस, फार्मा आणि रियल्टी (Realty) क्षेत्रातील शेअर्समध्ये घसरण झाली. ब्रॉडर मार्केटमध्येही (Broader Market) संमिश्र वातावरण होते. बीएसई मिडकैप इंडेक्सने ०.२० टक्क्यांची किरकोळ वाढ नोंदवली, तर बीएसई स्मॉलकॅप इंडेक्समध्ये मात्र ०.०९ टक्क्यांची घसरण दिसून आली. बाजारातील चढ-उतार: तेजीपेक्षा मंदीचे शेअर्स अधिक बॉम्बे स्टॉक एक्स्चेंज (BSE) वर एकूण ४,३६३ शेअर्समध्ये व्यवहार झाला. विशेष म्हणजे, आज वाढलेल्या शेअर्सच्या तुलनेत घसरलेल्या शेअर्सची संख्या अधिक होती. १,९५० शेअर्समध्ये तेजी,२,२३४ शेअर्स घसरले तर १७९ शेअर्स स्थिर राहिले. याव्यतिरिक्त, ११० शेअर्सनी आज आपला नवीन ५२ आठवड्यांचा उच्चांक गाठला, तर १७२ शेअर्सनी ५२ आठवड्यांचा नवा तळ पाहिला. सेन्सेक्समधील टॉप गेनर्स आणि लूजर्स – सेन्सेक्समधील ३० पैकी २४ शेअर्स वाढीसह बंद झाले. यामध्ये भारत इलेक्ट्रॉनिक्स (Bharat Electronics) च्या शेअर्समध्ये सर्वाधिक २.५२ टक्क्यांची तेजी दिसून आली. याशिवाय, महिंद्रा अँड महिंद्रा (M&M), अदाणी पोर्ट्स (Adani Ports), एचसीएल टेक (HCL Tech) आणि इटरनल (Eternal) यांसारख्या शेअर्सनी १.५३ ते २.४० टक्क्यांदरम्यान वाढ नोंदवली. दुसरीकडे, सेन्सेक्समधील ६ शेअर्स घसरणीसह बंद झाले. यामध्ये बजाज फायनान्स (Bajaj Finance) चा शेअर ७.३८ टक्क्यांच्या मोठ्या घसरणीसह टॉप लूजर ठरला. बजाज फिनसर्व्ह (Bajaj Finserv), टाटा मोटर्स पॅसेंजर व्हेईकल (TMPV), कोटक महिंद्रा बँक (Kotak Mahindra Bank) आणि पॉवरग्रिड (Power Grid) च्या शेअर्समध्येही ०.२२ ते ६.२६ टक्क्यांपर्यंत घसरण झाली.
