Stock market news : शेअर बाजारातील सेन्सेक्स आणि निफ्टीने गुरुवारी तीन दिवसांची घसरण थांबवत वाढ नोंदवली. व्यवहाराच्या अखेरच्या टप्प्यात एचडीएफसी बँक आणि अ‍ॅक्सिस बँकेच्या समभागांत झालेल्या खरेदीमुळे बाजाराला आधार मिळाला.

मात्र, प्रति बॅरल 100 डॉलरच्या वर गेलेल्या कच्च्या तेलाच्या किमती आणि कायम असलेल्या भू-राजकीय तणावामुळे दिवसभर गुंतवणूकदारांचा उत्साह मर्यादित राहिला.

मुंबई शेअर बाजाराचा 30 समभागांचा सेन्सेक्स 138.36 अंकांनी, म्हणजेच 0.19 टक्क्यांनी वाढून 74,902.59 अंकांवर बंद झाला. दिवसभरात सेन्सेक्सने 74,910.96 अंकांची उच्चांकी आणि 74,598.47 अंकांची नीचांकी पातळी गाठली.

राष्ट्रीय शेअर बाजाराचा निफ्टी 46.30 अंकांनी, म्हणजेच 0.20 टक्क्यांनी वाढून 23,477.80 अंकांवर स्थिरावला.

सेन्सेक्समधील पॉवर ग्रिड, अ‍ॅक्सिस बँक, अल्ट्राटेक सिमेंट, एनटीपीसी, टेक महिंद्रा, भारती एअरटेल, एचडीएफसी बँक आणि लार्सन अँड टुब्रोच्या समभागांत वाढ झाली. एचसीएल टेक, टाटा स्टील, ट्रेंट आणि आयटीसीचे समभाग घसरले.

जागतिक तेल बाजारातील प्रमुख निर्देशांक असलेल्या ब्रेंट कच्च्या तेलाच्या किमतीत 1.19 टक्क्यांची वाढ होऊन ती 102.20 डॉलर प्रति बॅरलवर पोहोचली. त्यामुळे बाजारातील चिंता कायम राहिली.

आशियाई बाजारांत दक्षिण कोरियाचा कोस्पी, शांघायचा एसएसई निर्देशांक आणि हाँगकाँगचा हँगसेंग घसरले. जपानचा निक्केई मात्र वाढीसह बंद झाला. युरोपीय बाजारांत संमिश्र स्थिती होती. अमेरिकेतील बाजार बुधवारी घसरणीसह बंद झाले.

दरम्यान, अमेरिकेतील महागाईची आगामी आकडेवारी आणि त्याचा व्याजदरांवरील परिणाम याकडे गुंतवणूकदारांचे लक्ष लागले आहे. बुधवारी परदेशी संस्थात्मक गुंतवणूकदारांनी भारतीय शेअर बाजारात 582.99 कोटी रुपयांच्या समभागांची विक्री केली.

बुधवारी सेन्सेक्स 813.35 अंकांनी घसरून 74,764.23 अंकांवर, तर निफ्टी 203.60 अंकांनी घसरून 23,431.50 अंकांवर बंद झाला होता.