Stock market : कच्च्या तेलाच्या दरात नरमाई आणि पश्चिम आशियातील संघर्ष कमी होण्याच्या शक्यतेमुळे भारतीय शेअर बाजारात बुधवारी तेजी परतली. कच्च्या तेलाचा दर 100 डॉलर प्रति बॅरलच्या खाली राहिल्याने गुंतवणूकदारांचा विश्वास वाढला आहे.

मुंबई शेअर बाजाराचा निर्देशांक सेन्सेक्स 299.17 अंकांनी, म्हणजेच 0.40 टक्क्यांनी वाढून 74,828.25 अंकांवर बंद झाला. दिवसभरात सेन्सेक्सने 444.66 अंकांची वाढ नोंदवत 74,973.74 अंकांची पातळी गाठली होती.

राष्ट्रीय शेअर बाजाराचा निफ्टी 117.80 अंकांनी, म्हणजेच 0.50 टक्क्यांनी वाढून 23,446.80 अंकांवर स्थिरावला आहे.

सेन्सेक्समधील टाटा स्टील, बजाज फायनान्स, आयटीसी, अल्ट्राटेक सिमेंट, पॉवर ग्रिड आणि लार्सन अँड टुब्रोच्या शेअर्समध्ये वाढ झाली. तर एचसीएल टेक, इन्फोसिस, टाटा कन्सल्टन्सी सर्व्हिसेस, टायटन आणि महिंद्रा अँड महिंद्रा यांचे शेअर्स घसरले.

आंतरराष्ट्रीय बाजारात कच्च्या तेलाचा दर वाढला असला तरी ब्रेंट क्रूड 99.60 डॉलर प्रति बॅरलवर राहिले. आशियाई बाजारात दक्षिण कोरियाचा कोस्पी वाढला, तर शांघाय आणि हाँगकाँगचे बाजार घसरणीसह बंद झाले.

दरम्यान, आशियाई विकास बँकेने भारताच्या 2026-27 या आर्थिक वर्षातील आर्थिक वाढीचा अंदाज वाढवून 7 टक्के केला आहे. यामुळे भारतीय अर्थव्यवस्थेबाबत गुंतवणूकदारांचा विश्वास वाढल्याचे बाजार विश्लेषकांनी सांगितले.

मंगळवारी परदेशी संस्थात्मक गुंतवणूकदारांनी भारतीय शेअर बाजारातून 3,809.99 कोटी रुपयांचे समभाग विकले होते. त्याच दिवशी सेन्सेक्स 329.91 अंकांनी, तर निफ्टी 85.30 अंकांनी घसरला होता.