Stock Market : कच्च्या तेलाच्या किमतीत झालेली मोठी घसरण आणि बँकिंग शेअर्समधील खरेदी यामुळे बुधवारी (11 नोव्हेंबर) भारतीय शेअर बाजारात जोरदार तेजी पाहायला मिळाली. सेन्सेक्स 772.75 अंकांनी वाढून 81,879.40 वर बंद झाला. तर निफ्टी 210.40 अंकांची वाढ नोंदवत 25,255.05 वर पोहोचला. विशेष म्हणजे, 22 जानेवारी 2026 नंतर प्रथमच निफ्टी 25,200 अंकांच्या वर बंद झाला आहे.

दिवसभरातील व्यवहारात सेन्सेक्सने 82,520.40 अंकांची उच्चांकी पातळी गाठली होती. तर निफ्टी 25,424.35 अंकांपर्यंत पोहोचला होता. मात्र, दिवसअखेर दोन्ही निर्देशांक काही प्रमाणात खाली आले. तरीही बाजारात खरेदीचा उत्साह कायम राहिला.

गुंतवणूकदारांची संपत्ती 3.48 लाख कोटींनी वाढली

बुधवारच्या तेजीमुळे शेअर बाजारातील गुंतवणूकदारांच्या संपत्तीत मोठी वाढ झाली. 9 नोव्हेंबर रोजी बीएसईवर नोंदणीकृत कंपन्यांचे एकूण बाजारमूल्य 5,07,26,775.39 कोटी रुपये होते. बुधवारी ते वाढून 5,10,75,632.25 कोटी रुपयांवर पोहोचले. म्हणजेच एकाच दिवसात गुंतवणूकदारांच्या संपत्तीत 3,48,856.86 कोटी रुपयांची भर पडली.

एमअँडएम, इंडिगोच्या शेअर्समध्ये मोठी वाढ

सेन्सेक्समधील 30 कंपन्यांपैकी 20 कंपन्यांचे शेअर्स वाढीसह बंद झाले. यामध्ये महिंद्रा अँड महिंद्रा (M&M), इंडिगो आणि ट्रेंट यांच्या शेअर्समध्ये सर्वाधिक वाढ झाली. मोठ्या कंपन्यांसोबतच मध्यम आणि छोट्या कंपन्यांच्या शेअर्समध्येही खरेदी दिसून आली.

निफ्टी मिडकॅप 100 निर्देशांकात जवळपास 1 टक्क्यांची वाढ झाली. तर निफ्टी स्मॉलकॅप 100 मध्ये दीड टक्क्यांहून अधिक तेजी नोंदवण्यात आली. यावरून छोट्या कंपन्यांच्या शेअर्समध्येही गुंतवणूकदारांचा उत्साह दिसून आला.

144 शेअर्स वर्षभरातील उच्चांकावर

बुधवारी बीएसईवर एकूण 4,712 शेअर्समध्ये व्यवहार झाले. त्यापैकी 2,913 शेअर्सच्या किमती वाढल्या, तर 1,592 शेअर्स घसरणीसह बंद झाले. 207 शेअर्सच्या किमतीत कोणताही बदल झाला नाही. विशेष म्हणजे, 144 शेअर्सनी गेल्या वर्षभरातील सर्वोच्च पातळी गाठली, तर 57 शेअर्स वर्षभरातील नीचांकी पातळीवर पोहोचले. आठ शेअर्स अप्पर सर्किटमध्ये, तर 37 शेअर्स लोअर सर्किटमध्ये बंद झाले.

बाजारातील अस्थिरतेचा इशारा कायम

बाजारात तेजी असली तरी अस्थिरतेचा धोका कायम आहे. बाजारातील संभाव्य चढ-उतार मोजणारा इंडिया व्हीआयएक्स (India VIX) 0.86 टक्क्यांनी वाढून 17.57 वर बंद झाला. व्हीआयएक्स वाढल्यास नजीकच्या काळात बाजारात चढ-उतार होण्याची शक्यता अधिक असल्याचे मानले जाते.

डिस्क्लेमर : ही बातमी केवळ माहितीच्या उद्देशाने आहे. शेअर बाजारातील गुंतवणूक जोखमीच्या अधीन असते. गुंतवणूक करण्यापूर्वी आर्थिक तज्ज्ञांचा सल्ला घ्यावा. दैनिक प्रभात कोणत्याही शेअरमध्ये गुंतवणूक करण्याचा सल्ला देत नाही.