Share market crash : शेअर बाजारात गुरुवारी (24 सप्टेंबर) मोठी घसरण झाली. सेन्सेक्स आणि निफ्टी दोन्ही निर्देशांक गडगडले. सेन्सेक्स 1,247.71 अंकांनी घसरून 73,580.54 अंकांवर बंद झाला. तर निफ्टी 383.70 अंकांनी घसरत 23,063.10 अंकांवर स्थिरावला. दिवसभरात सेन्सेक्स 1,264 अंकांपर्यंत घसरला होता. निफ्टीही 23,050 अंकांच्या जवळ पोहोचला होता.

या घसरणीचा मोठा परिणाम गुंतवणूकदारांच्या संपत्तीवर झाला. 23 सप्टेंबर रोजी बीएसईवरील सर्व सूचीबद्ध कंपन्यांचे एकूण बाजारमूल्य 4,85,01,353.86 कोटी रुपये होते. गुरुवारी ते 4,80,99,180.54 कोटी रुपयांवर आले. त्यामुळे एका दिवसात बाजारमूल्यात सुमारे 4,02,173 कोटी रुपयांची घट झाली.

बाजारातील जवळपास सर्वच प्रमुख क्षेत्रांमध्ये विक्रीचा दबाव दिसून आला. खासगी बँकांचा निर्देशांक 2 टक्क्यांहून अधिक घसरला. सरकारी बँका, धातू, वाहन, एफएमसीजी आणि रिअल्टी क्षेत्रातील शेअर्समध्येही मोठी घसरण झाली. माहिती-तंत्रज्ञान क्षेत्रही सुमारे अर्धा टक्का कमजोर झाले.

सेन्सेक्समधील 30 पैकी केवळ एनटीपीसीचा शेअर वाढीसह बंद झाला. बजाज फायनान्स, अॅक्सिस बँक आणि बजाज फिनसर्व्हमध्ये मोठी घसरण झाली.

बीएसईवर गुरुवारी 4,573 शेअर्समध्ये व्यवहार झाले. त्यापैकी 2,884 शेअर्स घसरले, तर 1,473 शेअर्समध्ये वाढ झाली. 216 शेअर्सच्या दरात कोणताही बदल झाला नाही. 147 शेअर्सनी वर्षातील उच्चांक गाठला, तर 99 शेअर्स वर्षातील नीचांकी पातळीवर पोहोचले.

आज बाजार का कोसळला?  (Share market crash) 

1. अमेरिकेतील बाँडवरील परतावा वाढला
अमेरिकेच्या 10 वर्षांच्या सरकारी बाँडवरील परतावा 5.10%च्या आसपास पोहोचला. त्यामुळे गुंतवणूकदारांना सुरक्षित अमेरिकी मालमत्तेत गुंतवणूक करण्याचा कल वाढतो. परिणामी भारतासारख्या उदयोन्मुख बाजारांवर दबाव येतो.

2. कच्च्या तेलाचा भाव पुन्हा 100 डॉलरच्या वर
ब्रेंट कच्च्या तेलाचा भाव आज 105-106 डॉलरच्या आसपास गेला. इराण-अमेरिका तणावामुळे तेलपुरवठ्याबाबत चिंता वाढली आहे. भारत मोठ्या प्रमाणावर कच्चे तेल आयात करत असल्याने तेल महागल्यास आयात खर्च, महागाई आणि रुपयावर दबाव येऊ शकतो.

3. विमा क्षेत्रातील प्रस्तावित नियमांचा मोठा धक्का
विमा नियामकाच्या नव्या प्रस्तावात विमा विक्रीवरील कमिशन आणि वितरणाशी संबंधित नियमांमध्ये बदल सुचवण्यात आले आहेत. त्यामुळे विमा कंपन्या, विमा विक्री करणाऱ्या कंपन्या, बँका आणि काही वित्तीय कंपन्यांच्या कमाईवर परिणाम होण्याची भीती निर्माण झाली. यामुळे वित्तीय शेअर्समध्ये जोरदार विक्री झाली.

4. बँकिंग आणि वित्तीय शेअर्समध्ये मोठी विक्री
आज खासगी बँक निर्देशांक सुमारे 2.2% घसरला. बजाज फायनान्स, अॅक्सिस बँक, बजाज फिनसर्व्ह यांसारख्या शेअर्समध्ये मोठी घसरण झाली. सेन्सेक्स आणि निफ्टीमध्ये वित्तीय कंपन्यांचे वजन मोठे असल्याने या घसरणीचा संपूर्ण बाजारावर परिणाम झाला.

5. जागतिक बाजारातील ‘रिस्क ऑफ’ वातावरण
अमेरिकेतील बाँड बाजारातील विक्री, वाढता डॉलर, तेलाचे वाढते दर आणि अमेरिका-इराण तणावामुळे जागतिक गुंतवणूकदारांमध्ये सावध भूमिका दिसली. त्याचा परिणाम आशियाई बाजारांवरही झाला आणि भारतीय बाजारात विक्री वाढली.

6. परदेशी गुंतवणूकदारांकडून विक्रीचा दबाव
सप्टेंबरमध्ये भारतीय शेअर बाजारातून परदेशी पोर्टफोलिओ गुंतवणूकदारांनी मोठ्या प्रमाणात पैसा काढला आहे. उच्च अमेरिकी व्याजदर, बाँडवरील वाढता परतावा, महाग तेल आणि कमजोर रुपया यामुळे भारतातील गुंतवणुकीबाबत त्यांची सावध भूमिका कायम आहे.