Sanjay Raut : आगामी महापालिका निवडणुकीच्या निमित्ताने राज्यातील राजकारण चांगलेच तापले आहे. अनेक मोठ्या राजकीय घडामोडी घडत आहेत. अशातच पुणे जिल्ह्यातील बारामती येथील एका कार्यक्रमात शरद पवार, अजित पवार आणि गौतम अदानी एकाच मंचावर आल्याचे पाहायला मिळाले आहे. यावरून उबाठा गटाचे नेते खासदार संजय राऊत यांनी मोठा खळबळजनक दावा केला आहे. शरद पवारांचा पक्ष फोडण्यात गौतम अदानींच्या भावाचा सहभाग होता, अशी माझी ऐकीव माहिती असल्याचे संजय राऊत म्हणाले आहेत. त्यांनी केलेल्या या दाव्यामुळे राजकीय वर्तुळात मोठी खळबळ उडाली आहे. बारामती येथे ‘शरद पवार सेंटर ऑफ एक्सलन्स इन आर्टिफिशियल इंटेलिजन्स’ या केंद्राचे उद्घाटन कार्यक्रमाला गौतम अदानी आणि पवार कुटुंबातील सर्व दिग्गज नेते एकाच मंचावर दिसून आले. काँग्रेसकडून पंतप्रधान नरेंद्र मोदी आणि गौतम अदानी यांच्या संबंधांवर सतत टीका होत असतानाच शरद पवार आणि गौतम अदानी एकत्र आल्याने राजकीय वर्तुळात चर्चांना उधाण आले आहे. मुंबईवर मोदींचा आणि भाजपचा मित्र ज्या पद्धतीने ताबा मिळवत आहे, त्याला आमचा तात्विक आणि नैतिक विरोध आहे. गौतम अदानी यांना मुंबईला ताब्यात घेण्याच्या विरोधात मुंबईची लढाई आहे. भारतीय जनता पक्षाच्या मदतीने मुंबई गिळण्याचा प्रयत्न होत आहे. ते उद्योगपती आहेत. पण गौतम अदानींसारखा हव्यास इतर उद्योगपतींनी मुंबईच्या बाबतीत दाखवल्याचे दिसून येत नाही, अशी बोचरी टीका संजय राऊत यांनी केली आहे. शरद पवार आणि गौतम अदानी यांचे संबंध राजकीय नाहीत. कौटुंबिक आणि व्यक्तिगत आहेत. आपल्या कार्यक्रमाला कुणाला बोलवायचे हा ज्याचा त्याचा प्रश्न असतो. त्यांनी गौतम अदाणींना बोलावलं असेल आणि त्यासाठी पवारांचे संपूर्ण कुटुंब ज्यांनी पक्ष फोडला ते अजित पवार सुद्धा उपस्थित असतील तर तो त्यांचा व्यक्तिगत प्रश्न आहे, असेही संजय राऊत म्हणाले आहेत. हेही वाचा : अखेर धंगेकरांनी मनातली खदखद बोलून दाखवली; मोठा निर्णय घेण्याच्या तयारीत, पुण्यात हालचालींना वेग
