Sharad Pawar masterstroke : राष्ट्रवादी काँग्रेसचे (शरदचंद्र पवार गट) अध्यक्ष शरद पवार सध्या राजकीय फिल्डिंगमध्ये नवी चाल खेळताना दिसत आहेत. महापालिका आणि ग्रामपंचायत निवडणुकांच्या पार्श्वभूमीवर पवारांनी भाजपविरोधात नवा गेमप्लान तयार केला आहे.

गेल्या काही दिवसांपासून शरद पवार गट आणि अजित पवार गट पुन्हा एकत्र येणार असल्याच्या चर्चा रंगात आहेत. दोन्ही गटातील नेत्यांकडून या चर्चांना सकारात्मक प्रतिसादही दिला गेला. काही दिवसांपूर्वी शरद पवारांनी “पक्षातील काही जण अजित पवार गटात जाण्यास इच्छुक आहेत, मात्र निर्णयाचा अधिकार सुप्रिया सुळे यांच्याकडे आहे,” असं वक्तव्य करून संकेत दिले होते.

भाजप वगळता कोणत्याही पक्षाशी युती

या पार्श्वभूमीवर आता समोर येत असलेल्या माहितीप्रमाणे, शरद पवार यांनी आगामी स्थानिक स्वराज्य संस्था आणि ग्रामपंचायत निवडणुकांसाठी महायुतीला शह देणारी चाणाक्ष रणनीती आखली आहे. भाजप वगळता अजित पवार गट आणि एकनाथ शिंदे गटासह कोणत्याही पक्षाशी युती करण्याचे निर्देश पवारांनी पक्षाच्या वरिष्ठ नेत्यांना दिले आहेत. या खेळीमुळे स्थानिक पातळीवर दोन्ही राष्ट्रवादी गटांचे मनोमिलन होण्याची शक्यता आहे, तसेच महायुतीतील भाजपला मोठा फटका बसू शकतो.

भाजपला मोठा फटका बसणार?

शरद पवार यांच्या सूचनेनंतर पक्षातील अनेक नेते भाजपविरोधी आघाडी तयार करण्याच्या हालचाली करत आहेत. काही ठिकाणी अजित पवार गटासोबत, तर काही ठिकाणी शिंदे गटासोबत युतीचा पर्याय विचारात घेतला जात आहे. या सर्व घडामोडींमुळे भाजपच्या मित्रपक्षांनाच शरद पवार सोबत घेत असल्यामुळे भाजपला आगामी स्थानिक निवडणुकांमध्ये मोठा फटका बसू शकतो.

दुसरीकडे, महाविकास आघाडीमध्येही फारशी एकी उरलेली नाही. ठाकरे गट मनसेसोबत जवळ येण्याच्या प्रयत्नात आहे, तर काँग्रेसही गोंधळलेली दिसते. अशात शरद पवारांनी स्वतःची स्वतंत्र फिल्डिंग लावत महायुतीवर सरळ स्ट्राईक केल्याचे चित्र स्पष्ट होत आहे.

पवारांचा एका दगडात दोन पक्षी मारण्याचा डाव

दरम्यान, पवारांच्या या रणनीतीला अजित पवार गट आणि शिंदे गट कसा प्रतिसाद देतात, यावर स्थानिक निवडणुकांचे चित्र अवलंबून आहे. पवारांचा हा एका दगडात दोन पक्षी मारण्याचा डाव भाजपसाठी डोकेदुखी ठरू शकतो, तर महाविकास आघाडीतील अंतर्गत मतभेदही यामुळे समोर येऊ शकतात. शरद पवारांच्या या चाणाक्ष फिल्डिंग चे निकाल काय लागतात, हे पाहणे औत्सुक्याचे ठरेल.

पवारांची रणनीती काय?

• स्थानिक युतींची तयारी: काही महापालिका, जिल्हा परिषदा आणि नगर परिषदांमध्ये अजित पवार गट आणि काही ठिकाणी शिंदे गट यांच्यासोबत युती करण्याच्या हालचाली सुरू.
• भाजपला टार्गेट: पवारांनी भाजपला कमजोर करण्यासाठी त्यांच्याच मित्रपक्षांना सोबत घेण्याची रणनीती आखली आहे.
• महाविकास आघाडीतील अस्वस्थता: विधानसभा निवडणुकीनंतर ठाकरे गट आणि काँग्रेसमधील दुराव्याचा फायदा घेत पवारांनी स्वतंत्र रणनीती आखली.