जळगाव : जळगावात राष्ट्रवादी काँग्रेस शरद पवार गटाला लागलेली गळती थांबायचं नाव घेईना. शरद पवार गटाचे माजी मंत्री डॉक्टर सतीश पाटील आणि गुलाबराव देवकर यांचा उद्या मुंबईत अजित पवार गटात प्रवेश होणार आहे. अशातच आता राष्ट्रवादी युवक काँग्रेस शरद पवार पक्षाचे जिल्हाध्यक्ष उमेश पाटील यांनी जिल्हा अध्यक्षपदाचा राजीनामा दिला आहे. लवकरच ते राष्ट्रवादी काँग्रेस अजित पवार गटात प्रवेश करणार आहेत. उमेश पाटील यांनी त्यांचा राजीनामा राष्ट्रवादी शरद पवार पक्षाचे युवक प्रदेशाध्यक्ष मेहबूब शेख यांच्याकडे सोशल मीडियाद्वारे पाठवला आहे. त्यामुळे शरद पवार गटाला जळगावात मोठा धक्का बसणार आहे. जळगाव जिल्ह्यात राष्ट्रवादी काँग्रेस शरद पवार पक्षाला गळती लागली असून माजी मंत्री गुलाबराव देवकर, माजी मंत्री सतीश पाटील हे अजित पवार गटात प्रवेश करणार आहेत. आता त्या पाठोपाठ राष्ट्रवादी युवक काँग्रेस जिल्हाध्यक्ष उमेश पाटील यांनीही पक्षाला सोडचिठ्ठी दिली आहे. उमेश पाटील हे राष्ट्रवादी काँग्रेस अजित पवार गटाच्या वाटेवर आहेत. ते उद्या राष्ट्रवादी अजित पवार पक्षात प्रवेश करणार आहेत. शरद पवार गटाला जळगावमध्ये अपयश लोकसभा आणि विधानसभा निवडणुकीमध्ये राष्ट्रवादी काँग्रेस शरद पवार गटाला जळगाव जिल्ह्यात मोठ्या अपयशाला सामोरे जावे लागले होते. या पार्श्वभूमीवर पक्षाच्या कार्यकर्त्यांमध्ये नाराजी पसरली आहे. आता स्थानिक स्वराज्य संस्थांच्या निवडणुका जवळ आल्याने, अनेक कार्यकर्ते, सत्ताधारी गटात असणेच फायदेशीर आहे असं मानू लागले आहेत. या पार्श्वभूमीवर पक्षांतर्गत हालचालींना वेग आल्याचे दिसत आहे. Ajit Pawar | जिल्ह्यात अजित पवार गटाला बळ मिळणार जिल्हाध्यक्ष संजय पवार म्हणाले की, आगामी स्थानिक स्वराज्य संस्थेच्या निवडणुकांसाठी जिल्ह्यात अजित पवार गटाला चांगले बळ मिळणार आहे. सध्या अनेक जण पक्षात येण्यासाठी इच्छुक आहेत. जिल्ह्यातील कोणत्या नेत्यांचा प्रवेश होणार, याबाबतचा सर्व निर्णय माजी मंत्री अनिल पाटील घेणार आहेत. अजित पवारांची वेळ घेऊन प्रवेशाचा अधिकृत निर्णय घेतला जाईल, असं संजय पवार म्हणाले.
