Sharad Pawar group ।  राज्यातील विधानसभा निवडणुकीची आज घोषणा होणार आहे.  त्यासाठी आज निवडणूक आयोग पत्रकार परिषद घेऊन तारखांची घोषणा करणार असल्याचे सांगण्यात येत आहे. याच पार्श्वभूमीवर राज्याच्या राजकारणात देखील मोठ्या हालचाली होताना दिसून येत आहे. आज पुण्यात शरद पवारांच्या भेटीसाठी अनके नेत्यांनी हजेरी लावली, यामध्ये मुख्यत्वे अजित पवार गटाचे मुख्य प्रवक्ते उमेश पाटील यांच्या सह अनेक नेते शरद पवारांच्या भेटीला आल्याने चर्चांना उधाण आले आहे.

उमेश पाटील तुतारी हाती घेणार Sharad Pawar group ।

उपमुख्यमंत्री अजित पवार  यांच्या राष्ट्रवादी काँग्रेसचे मुख्य प्रवक्ते उमेश पाटील यांनी आपल्या पदाचा राजीनामा दिला आहे. त्यांनी पक्ष सोडू नये, यासाठी वरिष्ठ पातळीवरून प्रयत्न केले मात्र, उमेश पाटील आपल्या निर्णयावर ठाम राहिले. महाविकास आघाडीतील पक्षाकडून त्यांना पक्षप्रवेशाचे निमंत्रण मिळाले असून ते शरद पवारांच्या राष्ट्रवादीत जाणार की उद्धव ठाकरेंच्या शिवसेनेची मशाल हाती घेणार, याची मोहोळच्या राजकारणात चर्चा रंगली आहे. मात्र, आज ते शरद पवारांच्या भेटीला आले आहेत, यामुळे ते तुतारी हाती घेणार यावर शिक्कामोर्तब झाला असल्याचे दिसत आहे.

विलास लांडे,अतुल बेनके देखील शरद पवारांच्या भेटीला

पुण्यात शरद पवार यांच्या भेटीला अनेक नेते आज दाखल होत आहेत. यावेळी पिंपरी चिंचवड माजी आमदार विलास लांडे पुन्हा शरद पवारांच्या भेटीला आल्याचे दिसून आले, गेल्या काही दिवसांपासून ते सातत्याने शरद पवारांची भेट घेत आहेत. लोकसभा निवडणुकीवेळी अजित पवारांकडून त्यांना उमेदवारी मिळावी अशी त्यांची इच्छा होती, त्यावेळी तिकीट न मिळाल्याने त्यांच्या नाराजीच्या चर्चा राज्याच्या राजकीय वर्तुळात रंगल्या होत्या. विलास लांडे यांच्यासोबतच भाजप नेते पृथ्वीराज जाचक शरद पवारांच्या भेटीला आले आहेत. पुण्यातील मोदी बागेतील कार्यालयात या भेटी सुरू आहेत. त्याचबरोबर आमदार अतुल बेनके यांचे भाऊ डॉ अमोल बेनके देखील शरद पवार यांच्या भेटीला पोहोचले आहेत.

साहेब आमचे दैवत – विलास लांडे Sharad Pawar group ।
विलास लांडे यावेळी भेटीबाबत बोलताना म्हणाले, लपून छपून मी कधी भेटलो नाही. शरद पवारासोबत आम्ही कायम आहे, साहेब आमचे दैवत आहे, ते सर्वसामन्याचा नेता आहेत. शिरूर, पिंपरीमधील उमेदवाराबाबत चर्चा करण्यासाठी आलो आहे. आम्हाला अनेक जागा मिळतील. मी साहेबांसोबत आहे, लोकसभा निवडणुकीपासून सोबत आहे. अजित दादांनी लोकसभेला दिलेला उमेदवार पटलेला नव्हता. 18-19 तारखेला जागा वाटप शरद पवार जाहीर करणार आहेत. भोसरी, खेड, मावळ, पुणे या ठिकाणी प्रचार करणार आहे. अजित दादाशी वैयक्तिक संबंध आहेत, असेही त्यांनी यावेळी सांगितले आहे.