मुंबई – बॉलिवूडचा बादशहा शाहरुख खान आपल्या कुटुंबासह – पत्नी गौरी खान, मुलगी सुहाना, मुलगा आर्यन आणि लहानगा अबराम – मुंबईच्या पाली हिल येथील नव्या अस्थायी निवासस्थानी स्थलांतरित झाला आहे. त्यांचा प्रतिष्ठित बंगला मन्नत सध्या मोठ्या प्रमाणात नूतनीकरणाखाली असल्याने हे स्थलांतर झाले आहे. पापाराझींनी शाहरुखला त्याच्या व्यवस्थापक पूजा ददलानी आणि सुहानासह नव्या डुप्लेक्स अपार्टमेंटमध्ये प्रवेश करताना कॅमेऱ्यात टिपले. मन्नतच्या नूतनीकरणासाठी सुमारे दोन वर्षे लागणार असून, तोपर्यंत शाहरुख कुटुंब या नव्या घरी राहणार आहे.

झॅपकीच्या माहितीनुसार, शाहरुखने भगनानी कुटुंबाकडून दोन डुप्लेक्स अपार्टमेंट्स भाड्याने घेतले आहेत. चार मजल्यांचे हे अपार्टमेंट्स पूजा कासा इमारतीत असून, त्यांचे मासिक भाडे २४ लाख रुपये आहे. वार्षिक भाडे २.९ कोटी रुपये इतके आहे. या इमारतीचे मालक निर्माता वाशु भगनानी, त्यांची मुलगी दीपशिखा देशमुख आणि मुलगा जॅकी भगनानी आहेत. इमारतीचे नाव वाशु यांच्या पत्नी पूजा भगनानी यांच्यावरून ठेवण्यात आले आहे. हे अपार्टमेंट पॉश पाली हिल भागात असले तरी त्याचा आकार मन्नतच्या २७,००० चौरस फुटांच्या तुलनेत अर्धा, म्हणजेच १०,५०० चौरस फूट आहे. तरीही, येथे शाहरुखच्या सुरक्षारक्षकांसह कर्मचाऱ्यांसाठी पुरेशी जागा उपलब्ध आहे.

शाहरुखचे नवे शेजारी जॅकी भगनानी, त्यांची पत्नी रकुल प्रीत सिंग, वाशु आणि पूजा भगनानी असतील. समोरच दिग्गज अभिनेते दिलीप कुमार यांचा बंगला, तसेच संजय दत्त आणि कपूर कुटुंबाची हवेलीही या परिसरात आहे. मन्नत ही वारसा इमारत असून, ती १९१४ मध्ये नरीमन के. दुबाश यांनी बांधली होती. शाहरुखने १९९७ मध्ये येस बॉस चित्रपटाच्या चित्रीकरणादरम्यान ही संपत्ती पाहिली आणि २००१ मध्ये खरेदी केली. वारसा दर्जामुळे त्यात बदल करण्यास मर्यादा होत्या, म्हणून त्यांनी मागे मन्नत अॅनेक्सी नावाची सहा मजली इमारत बांधली.