मुंबई – तारक मेहता या भारतातील अत्यंत प्रसिध्द मालिकेतील कलाकार जेनिफर मिस्त्री हिने निर्माता आसित मोदी याच्यावर लैंगिक शोषणाचे अत्यंत गंभीर आरोप केल्यामुळे खळबळ उडाली आहे. जेनिफर ही या मालिकेत रोशनसिंग सोढी या व्यक्तीरेखेच्या पत्नीची अर्थात मिसेस सोढीची भूमिका करते. तारक मेहता का उल्ट चष्मा ही मालिका गेल्या 15 वर्षांपासून भारतातील प्रेक्षकांचे मनोरंजन करत असून लोकप्रियतेच्या बाबतीत अग्रस्थानावर आहे. या मालिकेतील व्यक्तीरेखाही घराघरात पोहोचल्या असून ती कायम चर्चेत असते. मात्र अलिकडच्या काळात तारक मेहता चुकीच्या कारणांमुळेच चर्चेत येत आहे. त्यातील एक प्रमुख कारण म्हणजे यातील अनेक कलाकारांनी मालिकेला रामराम केला आहे. निर्मात्यांची मनमानी किंवा निर्मात्यांशी मतभेदाचे कारण असे आरोप करत त्यांनी मालिका सोडली आहे. त्यात तारक मेहता हे पात्र साकारणाऱ्या शैलेश लोढा यांचाही समावेश आहे. मात्र आता थेट निर्मात्यांवरच लैंगिक शोषणाचा आरोप करण्याचा प्रकार पहिल्यांदा समोर आला आहे. आसित मोदी यांच्यासह प्रोजेक्ट हेड सोहेल रमानी आणि कार्यकारी निर्माता जतिन बजाज यांच्यावरही जेनिफरने आरोप केले आहेत. तिने या तिघांच्या विरोधात पोलिसांत तक्रार दाखल केली आहे. जेनिफरने काही काळापूर्वीच तारक मेहताच्या शूटींगमध्ये सहभागी होण्याचे थांबवले आहे. 7 मार्चनंतर तिने शूटींगमध्ये सहभाग घेतला नसल्याची माहिती तिने स्वत:च माध्यमांना दिली असून एका माध्यमावरच तिच्या गंभीर आरोपांची बातमी प्रसिध्द झाली आहे.
