बारामती :  राणा शिपिंग कंपनीचे मालक राणा सूर्यवंशी यांच्यावरील हल्ला प्रकरणाचा तपास पोलिसांनी वेगाने सुरू केला आहे. हल्लेखोरांचा शोध घेण्यासाठी सहा ते सात पथके तयार करण्यात आली असून, १५ ते २० पोलीस अधिकारी आणि ५० ते ६० पोलीस कर्मचारी तपासकामात सहभागी झाले आहेत. सीसीटीव्ही फुटेज तसेच विविध तांत्रिक माध्यमांच्या मदतीने हल्लेखोरांचा माग काढण्याचे प्रयत्न सुरू असल्याची माहिती उपविभागीय पोलीस अधिकारी चैतन्य कदम यांनी दिली.

बारामती परिसरात राणा सूर्यवंशी यांच्यावर झालेल्या हल्ल्यामुळे खळबळ उडाली आहे. या घटनेचे गांभीर्य लक्षात घेऊन पोलिसांनी तपासाची व्याप्ती वाढवली आहे. हल्लेखोरांची ओळख पटविणे, त्यांच्या हालचालींचा मागोवा घेणे आणि हल्ल्यामागील नेमके कारण शोधणे, या दृष्टीने तपास सुरू आहे.

घटनास्थळ परिसरातील सीसीटीव्ही फुटेज तपासण्यासह तांत्रिक माहितीचे विश्लेषण केले जात आहे. विविध पथकांच्या माध्यमातून समांतर तपास सुरू असून, हल्लेखोरांपर्यंत पोहोचण्यासाठी पोलिसांकडून प्रयत्न केले जात आहेत. दरम्यान, या हल्ल्यामागील नेमके कारण काय, हल्लेखोर कोण आहेत आणि त्यांचा पूर्वेतिहास काय, याबाबत अद्याप अधिकृत माहिती समोर आलेली नाही. पोलिसांच्या तपासातून पुढे काय निष्पन्न होते, याकडे लक्ष लागले आहे

सुनेत्रा पवार ॲक्शन मोडमध्ये

राणा शिपिंग कंपनीचे मालक राणा दिलीप सूर्यवंशी यांच्यावरील हल्ला प्रकरणाची ताजी माहिती शोधली असता, उपमुख्यमंत्री सुनेत्रा पवार यांनी या घटनेची गंभीर दखल घेत पुणे ग्रामीण पोलिसांना कठोर कारवाईचे निर्देश दिले आहेत. उपमुख्यमंत्री सुनेत्रा पवार यांनी पुणे ग्रामीणचे पोलीस अधीक्षक संदीप सिंह गिल यांना हल्लेखोरांना तातडीने अटक करून त्यांच्यावर कठोर कायदेशीर कारवाई करण्याच्या सूचना दिल्या आहेत. नागरिकांच्या सुरक्षिततेशी कोणालाही खेळू दिले जाणार नाही, अशी भूमिका त्यांनी घेतली आहे. खासदार सुप्रिया सुळे यांनी या घटनेनंतर राज्यातील कायदा-सुव्यवस्थेवर प्रश्न उपस्थित करत हल्लेखोरांना तातडीने अटक करण्याची मागणी केली.

गंभीर कलमांनुसार गुन्हा दाखल

याप्रकरणी लक्ष्मीकांत महादेव सूर्यवंशी (वय ४२, रा. जाचकवस्ती, पो. सणसर, ता. इंदापूर, जि. पुणे) यांच्या फिर्यादीवरून बारामती तालुका पोलीस ठाण्यात गुन्हा रजिस्टर क्रमांक ५२१/२०२६ अन्वये भारतीय न्याय संहिता कलम १०९(१), ११८(१)(२), ११५(२), ३(५) तसेच शस्त्र अधिनियमातील कलम ४/२५, ३/२५ आणि २७ नुसार गुन्हा दाखल करण्यात आला आहे.