Stock Market falls: पश्चिम आशियातील तणाव, वाढत्या कच्च्या तेलाच्या किमती आणि पंतप्रधान नरेंद्र मोदी यांच्या काटकसरीच्या आवाहनामुळे गुंतवणूकदारांमध्ये भीतीचे वातावरण निर्माण झाल्याने सोमवारी सलग तिसऱ्या दिवशी शेअर बाजारात मोठी घसरण झाली. बीएसई सेन्सेक्स तब्बल १,३१२.९१ अंकांनी घसरून ७६,०१५.२८ वर बंद झाला, तर निफ्टी ३६०.३० अंकांनी कोसळून २३,८१५.८५ वर स्थिरावला. दिवसभरात सेन्सेक्सने १,३७० अंकांची घसरण अनुभवत ७५,९५७ या नीचांकी पातळीपर्यंत मजल मारली होती. गेल्या तीन व्यवहार सत्रांत सेन्सेक्स जवळपास १,९५० अंकांनी म्हणजेच २.५ टक्क्यांनी घसरला असून निफ्टीतही ५१५ अंकांची घसरण नोंदवली गेली आहे. अमेरिकेचे अध्यक्ष डोनाल्ड ट्रम्प (Donald Trump) यांनी इराणच्या शांतता प्रस्तावाला “पूर्णपणे अस्वीकार्य” ठरविल्यानंतर पश्चिम आशियातील युद्ध थांबण्याच्या आशा मावळल्या. त्यामुळे जागतिक बाजारात कच्च्या तेलाच्या किमतींनी पुन्हा उसळी घेतली. ब्रेंट क्रूडचा दर २.२३ टक्क्यांनी वाढून प्रति बॅरल १०३.५ डॉलरवर पोहोचला. हेही वाचा – पंतप्रधान मोदींनी सोने खरेदीबाबत सावधगिरीचा इशारा का दिला? रुपया, डॉलर आणि देशाच्या अर्थव्यवस्थेचे संपूर्ण गणित समजून घ्या… याशिवाय पंतप्रधान नरेंद्र मोदी (Narendra Modi) यांनी रविवारी इंधन बचत, सोन्याची खरेदी पुढे ढकलणे आणि परदेश प्रवास टाळण्याचे आवाहन केल्याने गुंतवणूकदारांमध्ये अर्थव्यवस्थेबाबत चिंता वाढली. परकीय चलन साठा, इंधन खर्च आणि चालू खात्यातील तुटीवर दबाव वाढण्याची भीती बाजाराने व्यक्त केली. कोणते शेअर्स वाढले कोणते घटले ? सेन्सेक्समधील ३० कंपन्यांपैकी टायटनचे शेअर्स जवळपास ७ टक्क्यांनी घसरले. इंटरग्लोब एव्हिएशन, स्टेट बँक, भारती एअरटेल, रिलायन्स इंडस्ट्रीज आणि इटर्नल या कंपन्यांमध्येही मोठी विक्री झाली. दुसरीकडे सन फार्मा, हिंदुस्तान युनिलिव्हर, अदानी पोर्ट्स, कोटक महिंद्रा बँक, अॅक्सिस बँक आणि आयसीआयसीआय बँक या शेअर्समध्ये वाढ दिसून आली. एलकेजी वेल्थचे संशोधन विश्लेषक हरिप्रसाद के. यांनी सांगितले की, “भूराजकीय तणाव आणि वाढत्या महागाईच्या भीतीमुळे गुंतवणूकदारांनी मोठ्या प्रमाणावर विक्री केली. कच्च्या तेलाच्या वाढत्या किमती आणि युद्धजन्य परिस्थितीमुळे बाजारावर दबाव निर्माण झाला.” जिओजित इन्व्हेस्टमेंट्सचे संशोधन प्रमुख विनोद नायर यांच्या मते, “गल्फमधील तणाव आणि वाढत्या कच्च्या तेलाच्या किमतींमुळे भारतीय अर्थव्यवस्थेवर परिणाम होण्याची भीती निर्माण झाली आहे. रुपयावरील दबाव आणि चालू खात्यातील तूट वाढण्याची शक्यता गुंतवणूकदारांना सतावत आहे.” दरम्यान, परदेशी संस्थात्मक गुंतवणूकदारांनी (FII) शुक्रवारी ४,११०.६० कोटी रुपयांच्या शेअर्सची विक्री केल्याची माहिती समोर आली आहे. आशियाई बाजारांत मिश्र वातावरण होते, तर युरोपीय बाजारातही घसरणीचा कल दिसून आला. रुपया विक्रमी नीचांकी पातळीवर – इराण-इस्रायल-अमेरिका संघर्षामुळे वाढलेल्या कच्च्या तेलाच्या किमती, मजबूत डॉलर आणि परकीय गुंतवणूकदारांच्या विक्रीमुळे रुपया सोमवारी तब्बल ८२ पैशांनी घसरून डॉलरच्या तुलनेत विक्रमी ९५.३१ वर बंद झाला.
