Stock Market : महिनाअखेरीच्या डेरिव्हेटिव्ह्ज एक्सपायरीच्या दिवशी भारतीय शेअर बाजारात मोठी घसरण झाली. एचडीएफसी बँकेच्या शेअर्समध्ये झालेली विक्री आणि मध्य-पूर्वेतील भू-राजकीय अनिश्चिततेचा बाजाराच्या सेंटीमेंटवर परिणाम झाला. सलग दुसऱ्या दिवशी बाजार घसरला.

30 शेअर्सचा बीएसई सेन्सेक्स 539.35 अंकांनी (0.70 टक्के) घसरून 76,933.59 अंकांवर बंद झाला. विशेष म्हणजे, दिवसाच्या नीचांकी पातळीवरच सेन्सेक्सचा व्यवहार बंद झाला. त्याचप्रमाणे, 50 शेअर्सचा एनएसई निफ्टी 116.90 अंकांनी (0.48 टक्के) घसरून 24,090.85 अंकांवर स्थिरावला. निफ्टीनेही दिवसाच्या नीचांकी पातळीवरच व्यवहाराची सांगता केली.

सेन्सेक्समधील प्रमुख घसरणाऱ्या शेअर्समध्ये एचडीएफसी बँक, एनटीपीसी, महिंद्रा अँड महिंद्रा, भारती एअरटेल, एचसीएल टेक आणि आयटीसी यांचा समावेश होता. दुसरीकडे कोटक महिंद्रा बँक, आयसीआयसीआय बँक, टेक महिंद्रा आणि भारत इलेक्ट्रॉनिक्स यांच्या शेअर्समध्ये वाढ झाली.

गुंतवणूकदारांचे ₹3.69 लाख कोटींचे नुकसान –

26 ऑगस्ट रोजी, बीएसईवर सूचीबद्ध असलेल्या सर्व शेअर्सचे एकूण बाजार भांडवल ₹4,95,23,276.02 कोटी होते. आज, 27 ऑगस्ट रोजी, ते घसरून ₹4,91,54,107.21 कोटी झाले आहे. याचा अर्थ असा की, आज गुंतवणूकदारांच्या भांडवलात ₹3,69,168.81 कोटींची घट झाली आहे.

दरम्यान, आंतरराष्ट्रीय बाजारात कच्च्या तेलाच्या किमतीत वाढ झाली. ब्रेंट क्रूड 0.67 टक्क्यांनी वाढून 88.43 डॉलर प्रति बॅरल झाले.

जिओजित इन्व्हेस्टमेंट्सचे संशोधन प्रमुख विनोद नायर यांच्या मते, एक्सपायरीमुळे निर्माण झालेली अस्थिरता आणि मध्य-पूर्वेत राजनैतिक तोडगा न निघाल्याने नजीकच्या काळात बाजार मर्यादित पातळीत राहण्याची शक्यता आहे.

आशियाई बाजारात दक्षिण कोरियाचा कोस्पी आणि शांघायचा एसएसई कम्पोझिट निर्देशांक वाढीसह बंद झाले. मात्र, जपानचा निक्केई 225 आणि हाँगकाँगचा हँग सेंग घसरणीसह बंद झाले. युरोपियन बाजारातही बहुतांश निर्देशांक दबावात होते. बुधवारी अमेरिकन बाजार घसरणीसह बंद झाले.

दरम्यान, बुधवारी परदेशी संस्थात्मक गुंतवणूकदारांनी (FIIs) 502.63 कोटी रुपयांची शेअर खरेदी केली. बुधवारी सेन्सेक्स 183.15 अंकांनी घसरून 77,472.94, तर निफ्टी 126.80 अंकांनी घसरून 24,207.75 अंकांवर बंद झाला.