Pune City Congress : गेल्या काही महिन्यांपासून पुणे शहर काँग्रेसमध्ये अंतर्गत गटबाजी शहराध्यक्ष पदावरून सुरू असलेली कुरघोडी आणि पक्षाला लागलेली गळती. या पार्श्वभूमीवर मुंबईत पुण्यातील वरिष्ठ नेत्यांना बैठकीसाठी बोलण्यात आल्याची माहिती मिळत आहे. मुंबईत वरील प्रश्नासंदर्भात चर्चा केली जाणार असून, या गोष्टी थांबविण्यासाठी पक्षाचे प्रदेशाध्यक्ष हर्षवर्धन सपकाळ पुढाकार घेणार असल्याचे समजते. आगामी महापालिका निवडणुकीच्या तोंडावर काँग्रेसमधील सुरू असलेली गटबाजी, कुरघोड्या आणि गळती ही पक्षाला परवडणारी नाही. त्यामुळे आत्ताच या सर्व गोष्टींचा निकाल लावणे आवश्यक असल्याचे सांगितले जात आहे. या बैठकीत या सर्व गोष्टींवर तोडगा काढला जाणार असल्याची माहिती आहे. या बैठकीला पुणे काँग्रेससाठी निरीक्षक म्हणून नियुक्त करण्यात आलेले निरीक्षक सतेज उर्फ बंटी पाटील हे देखील उपस्थित राहणार आहेत. त्यांनी पक्षश्रेष्ठींकडे सादर केलल्या अहवालावर देखील सविस्तर चर्चा बैठकीत केली जाणार आहे. शहराध्यक्ष पदावरून अनेक इच्छुकांमध्ये स्पर्धा त्या अहवालाच्या आधारावर पुणे काँग्रेसमधील बदल निश्चित केले जाणार आहेत. पाटील यांनी सूचवलेले संघटनात्मक बदलही बैठकीत अंतिम केले जाऊ शकतात. तसेच शहराध्यक्ष पदाबाबतही बैठकीनंतर हर्षवर्धन सपकाळ हे महत्वाचा निर्णय जाहीर करणार असल्याचे सांगितले जात आहे. सध्या शहराध्यक्ष पदावरून अनेक इच्छुकांमध्ये स्पर्धा सुरू झाली आहे. त्यामुळे पक्षातील अंतर्गत वातावरण चांगलेच तापले आहे. शहरातील काँग्रेसमध्ये तीन गट तीन इच्छुक उमेदवारांना शहराध्यक्ष करावे यासाठी ताकद लावताना पाहायला मिळत आहे. यामध्ये सध्याचे शहराध्यक्ष असलेल्या अरविंद शिंदे यांचा एक गट, दुसरा गट माजी आमदार मोहन जोशी यांचा असून, तिसरा गट माजी आमदार रमेश बागवे यांच्या नावासाठी आग्रही आहे. त्यामुळे या बैठकीत कोणत्या गटाचा शहराध्यक्ष होणार आणि इतर दोन गट काय भूमिका घेणार याकडे आता सर्वांचे लक्ष लागलेले आहे. हेही वाचा: Sudhakar Badgujar in BJP : बडगुजरांचा भाजप प्रवेश संकटात? बावनकुळेंनी कॅसिनो वादाचा वचपा काढला? जुनं प्रकरण आलं समोर…
