SEBI Ban on Finfluencers:  भारतात शेअर बाजारात गुंतवणूक करणाऱ्यांची संख्या वाढली आहे. मात्र, अनेकजण अपुरे ज्ञान असतानाही बाजारात प्रचंड मोठी गुंतवणूक करतात. केवळ कोणाच्यातरी सांगण्यावरून गुंतवणूक केल्याने नुकसान देखील सहन करावे लागते. आता इतरांना गुंतवणुकीचा सल्ला देणाऱ्या फिनफ्लुएन्सर्सवर सेबीने कठोर नियम लादले आहेत.

सेबीने यासंदर्भीत नवीन परिपत्रक जारी केले आहे. कोणतीही पात्रता नसताना व नोंदणीकृत नसलेले अनेक फिनफ्लुएन्सर्स लोकांना आर्थिक गुंतवणुकीचा सल्ला देतात. मात्र, सेबीच्या नवीन नियमांमुळे अशा नोंदणी नसलेल्या सल्लागारांना चाप बसणार आहे. सेबीच्या नियमांनुसार आता आर्थिक सल्ला देणाऱ्यांना यापुढे रिअल-टाइम मार्केट डेटाचा वापर करता यणार नाही.

सेबीच्या नवीन नियमांनुसार, शैक्षणिक उद्देशाने काम करणाऱ्या व्यक्ती किंवा संस्थांना यापुढे रिअल-टाइम मार्केट डेटाचा वापर करता येणार नाहीत. म्हणजेच ते आता इतरांना शेअरच्या थेट किंमती दाखवून कोणता शेअर खरेदी करायचा अथवा विकायचा हे समजावून सांगू शकणार नाही. शैक्षणिक उद्देशाने इतरांना माहिती देताना त्यांना केवळ 3 महिन्यांच्या आधीचाच डेटा वापरावा लागेल.

नवीन नियमानुसार, जे स्वतःला आर्थिक सल्लागार किंवा शिक्षक म्हणवून घेत होते, त्यांना आता स्टॉक किंवा सिक्युरिटीजबद्दल भाकित करता येणार नाही. कोणताही सल्ला देताना किंवा माहिती देताना एखाद्या कंपनीचे नाव अथवा कोड वापरता येणार नाही. शेअर्सच्या किंमतीविषयी अंदाज व्यक्त करता येणार नाही. याशिवाय, नोंदणी नसताना कोणत्याही प्रकारचा गुंतवणूक सल्ला देता येणार नाही.  फिनफ्लुएन्सर्सला त्यांच्या व्हीडिओ अथवा टिकरमध्ये कोणत्याही कंपनीचे नाव अथवा कोड वापरता येणार नाही.

जर एखादी वित्तीय कंपनी खोटे दावे करणाऱ्या फिनफ्लुएन्सर्ससोबत काम करत असेल, तर त्या कंपनीलाही यासाठी जबाबदार धरले जाईल. शेअर बाजारासंबंधित माहिती इतरांना शिकवू शकतात, मात्र ट्रेडिंग टिप्स किंवा भविष्यातील किंमतीबाबत सल्ला देता येणार नाही. सेबी नोंदणीकृत संस्थेला कोणत्याही फिनफ्लुएन्सरसोबत काम करण्यासही मनाई आहे.

सेबीकडून यापूर्वीही यासंदर्भात परिपत्रक काढण्यात आले आहे. यानुसार, जर कोणत्याही व्यक्ती अथवा संस्थेने सेबीच्या या नियमांचे उल्लंघन केले तर दंड आणि कायदेशीर कारवाईला सामोरे जावे लागू शकते. याशिवाय, त्यांची नोंदणी देखील रद्द केली जाईल.