Satara News – भाजपचे नगरसेवक धनंजय जांभळे आरोग्य सभापती आहेत. त्यांनीच धावपळ करून गेल्या दोन दिवसांत सातत्याने सात टँकर सोनगाव कचरा डेपोत लावून तेथील आग आटोक्यात आणण्यासाठी प्रयत्न केले आहेत. मात्र, पावणेसात एकर क्षेत्र असणाऱ्या सोनगाव कचरा डेपोत क्षमतेपेक्षा तिप्पट स्वरूपात कचऱ्याचे ढीग साठल्याने अजूनही वणव्याची आग धुमसत आहे. परिणामी पुन्हा आग लागण्याच्या भीतीने संपूर्ण कचरा ओला केला जात आहे. प्रशासकीय काळामध्ये सोनगाव कचरा डेपोमध्ये बायोमायनिंग करण्याचा ठेका इंदूरच्या एका ठेकेदार कंपनीला देण्यात आला होता. या कंपनीने हा ठेका साताऱ्यातील इको सेव्ह नावाच्या दुसऱ्या कंपनीला चालवण्यासाठी दिला. ठेकेदाराच्या म्हणण्यानुसार सातारा शहरात संकलन प्रक्रियेच्या क्षमतेच्या तिपटीने कचरा येत असल्यामुळे बायोमायनिंग प्रक्रियेवर ताण येत आहे. कचरा वजन करण्याची मशीन 60 टनापर्यंत वजन करू शकते. प्रत्यक्षात कचरा 100 टनापेक्षा जास्त येत आहे. त्यामुळे लिचड व खते तयार होण्याच्या दृष्टीने बायोमायनिक प्रक्रियेवर मनुष्यबळ तसेच इतर सुविधांच्या अभावी प्रचंड ताण येत असून ही प्रक्रिया मंद गतीने सुरू आहे. कचरा डेपोत किती घंटागाड्यांच्या फेऱ्या झाल्या हे सुद्धा सीसीटीव्ही बंद असल्यामुळे कळू शकलेले नाही. सोनगाव कचरा डेपोला लागलेली आग तिसऱ्या दिवशीही धुमसत असून ही आग आटोक्यात आणण्यासाठी तब्बल सात टँकर तैनात असून आगीवर नियंत्रण मिळविण्याचे प्रयत्न बुधवारी दुपारपर्यंत सुरु होते. मात्र, बायोमायनिंग संथ गतीने होत आहे. तेथील वजन करणारी मशीन बंद आहे, सीसीटीव्हीही बंद आहे. यामुळे आरोग्य विभागाच्या गलथान कारभाराचा नमुना समोर आला आहे.
