मोरगिरी – दौलतनगर (पाटण) येथील लोकनेते बाळासाहेब देसाई शताब्दी स्मारकामध्ये महसूल विभागाच्यावतीने ‘छत्रपती शिवाजी महाराज’ अभियानांतर्गत आयोजित ‘सेवा पंधरवडा’ या उपक्रमाचा तालुकास्तरीय शुभारंभ उत्साहात पार पडला.

या कार्यक्रमाचा शुभारंभ पालकमंत्री शंभूराज देसाई यांच्या उपस्थितीत झाला पंतप्रधान नरेंद्र मोदी यांच्या जन्मदिनापासून (दि. १७ सप्टेंबर) ते राष्ट्रपिता महात्मा गांधी यांच्या जयंतीपर्यंत (दि. २ ऑक्टोबर) राज्यभर राबविण्यात येत असलेल्या ‘सेवा पंधरवडा’ उपक्रमाचा उद्देश म्हणजे लोकांच्या दारापर्यंत शासनाच्या विविध योजना सुलभ पद्धतीने पोहोचविणे हा आहे.

पाटण तालुक्यातील या उदघाटन सोहळ्यात एकूण ४७१ लाभार्थ्यांना विविध राष्ट्रीय व राज्य शासनाच्या योजनांमधील लाभ प्रत्यक्ष स्वरूपात प्रदान करण्यात आले. घरकुल, स्वयंसहाय्यता गटांना अनुदान, शेतकरी व सामाजिक कल्याण योजनांचे लाभ, तसेच विशेष प्रकरणांमध्ये आर्थिक सहाय्य यांचा समावेश होता.

विशेषत्वाने, अनेक वर्षे प्रलंबित असलेली काही प्रकरणे मार्गी लावून पात्र कुटुंबांना स्थायी हक्क मिळवून देण्यात आले, तर एका प्रकरणात लाभार्थ्याला २५ लाखांची मदत देण्यात आल्याचेही या सोहळ्यात नमूद करण्यात आले. या निमित्ताने पालकमंत्री शंभूराज देसाई यांनी प्रशासनाचे कौतुक करताना सांगितले की, नागरिकांच्या समस्या दूर करण्यासाठी शासनाची यंत्रणा थेट गावागावात पोहोचली पाहिजे.

यापुढे जनतेला आपले प्रश्न मांडण्यासाठी कार्यालयात धाव घ्यावी लागणार नाही, तर जिल्हा व तालुका प्रशासनाची विशेष पथके गावागावात जाऊन तक्रारींची नोंद घेतील आणि त्यावर त्वरीत कार्यवाही करतील. तसेच, जुनी जमीन-संपत्तीशी संबंधित नोंदी डिजिटल स्वरूपात जतन करण्याचेही निर्देश त्यांनी दिले.

या कार्यक्रमाला तहसीलदार, प्रांत अधिकारी, तालुकास्तरीय अधिकारी, पक्षाचे कार्यकर्ते व मोठ्या संख्येने नागरिक उपस्थित होते. या सेवापंधरवड्याचा उद्देश म्हणजे शासनाच्या कल्याणकारी योजनांची पारदर्शक व प्रभावी अंमलबजावणी करून समाजातील प्रत्येक घटकापर्यंत न्याय पोहोचवणे हा आहे.