Satara News : राज्याच्या जल व ऊर्जा व्यवस्थापनात केंद्रस्थानी असलेल्या कोयना प्रकल्पाच्या (Satara News) ओळखीत बदल करण्यात आला असून ‘कोयना सिंचन व्यवस्थापन’ या नावाने ओळखल्या जाणाऱ्या यंत्रणेचे नामांतर करून ‘कोयना जलविद्युत प्रकल्प’ असे नवे नाव देण्यात आले आहे.

एक जूनपासून या बदलाची अंमलबजावणी सुरू झाली असून सर्व शासकीय व्यवहारांमध्ये नव्या नावाचा वापर करण्यात येत आहे. सह्याद्रीच्या कुशीत उभा राहिलेला कोयना प्रकल्प केवळ धरण नसून महाराष्ट्राच्या प्रगतीचा आधारस्तंभ (Satara News) मानला जातो. कोयना प्रकल्पाची गौरवशाली कामगिरी राज्यासाठी अभिमानाची बाब ठरली आहे. अनेक दशकांपासून सातत्याने वीजनिर्मिती करत राज्याच्या ऊर्जा गरजा भागवण्यात या प्रकल्पाने मोलाचा वाटा उचलला आहे.

औद्योगिक विकास, ग्रामीण भागातील वीजपुरवठा आणि सिंचनासाठी पाणी उपलब्ध करून देण्यात कोयना प्रकल्पाचे योगदान अत्यंत महत्त्वपूर्ण राहिले आहे.
प्रकल्पाचे स्वरूप गेल्या काही वर्षांत अधिक व्यापक झाले असून जलसंपदा आणि ऊर्जा या दोन्ही क्षेत्रांचा समन्वय (Satara News) साधणारा प्रमुख केंद्रबिंदू म्हणून प्रकल्प उदयास आला आहे. त्यामुळे ‘सिंचन व्यवस्थापन’ या मर्यादित चौकटीतून बाहेर पडत प्रकल्पाच्या प्रत्यक्ष कार्याचे प्रतिबिंब दर्शवणारे ‘जलविद्युत प्रकल्प’ हे नाव देण्याचा निर्णय घेण्यात आला.

या नामांतराच्या निर्णयामागे जलसंपदामंत्री राधाकृष्ण विखे पाटील यांची दूरदृष्टी असल्याचे मानले जात आहे. जल आणि ऊर्जा या दोन्ही क्षेत्रांचा समतोल साधत राज्याच्या दीर्घकालीन विकासाला गती देण्याच्या दृष्टीने हा बदल महत्त्वपूर्ण ठरत आहे. या निर्णयावर अधीक्षक अभियंता अभय काटकर म्हणाले, ‘‘हे नामांतर म्हणजे कोयना प्रकल्पाच्या बदलत्या आणि विस्तारित भूमिकेची अधिकृत ओळख आहे.

आज कोयना केवळ सिंचनापुरता मर्यादित नसून राज्याच्या ऊर्जा सुरक्षेचा कणा बनला आहे. ‘जलविद्युत प्रकल्प’ ही ओळख देणे म्हणजे वास्तव स्वीकारणे होय. या बदलामुळे प्रशासनिक स्पष्टता वाढेल, निर्णय प्रक्रिया अधिक गतिमान होईल आणि जल- ऊर्जा समन्वय अधिक प्रभावीपणे साधता येईल.’’ “कोयना प्रकल्पाची गौरवशाली परंपरा जपत भविष्यातील गरजांशी सुसंगत राहणे आवश्यक आहे.

हे नामांतर त्या दिशेने उचललेले दूरदृष्टीपूर्ण आणि सकारात्मक पाऊल आहे,” असे त्यांनी नमूद केले. नामांतर हा केवळ शब्दांंचा बदल नसून कोयना प्रकल्पाच्या कार्यव्याप्तीचा विस्तार, त्याच्या ऐतिहासिक योगदानाची जाणीव आणि भविष्यातील आधुनिक वाटचालीचा संकेत आहे. ‘कोयना जलविद्युत प्रकल्प’ या नव्या नावासह प्रकल्पाची ओळख अधिक ठळक आणि प्रभावी व्हावी, अशी अपेक्षा व्यक्त होत आहे.