सातारा – वाई ,खंडाळा महाबळेश्वर विधानसभा मतदारसंघात माझ्याच घरात सर्व सत्ता घेऊन विद्यमान आमदारांनी लोकशाहीची थट्टा चालवली आहे. मीच आमदार, भाऊ खासदार, जिल्हा बँकेचा चेअरमन देखील आमच्याकडेच..,मीच दोन्ही साखर कारखान्याचा चेअरमन, आम्हीच बाजार समितीचे संचालक, आम्हीच सरपंच… असा ‘मी’ पणाच्या नादात विद्यमान आमदारांनी सत्तेचे केंद्रीकरण करून मतदारसंघात दहशत माजवली आहे. मात्र, मी संघर्षनायक आहे. जनतेच्या कल्याणासाठी गेली २२ वर्षे संघर्ष करतोय. आता घराणेशाहीची ‘पाटील’की मोडीत काढण्यासाठीच वाई, खंडाळा महाबळेश्वर तालुक्यांच्या मतदारसंघाच्या मैदानात उतरलो आहे, असा इशारा शिवसेनेचे जिल्हाप्रमुख पुरुषोत्तम जाधव यांनी दिला.

महाबळेश्वरच्या कोयना खोऱ्यात वाळणे (ता. महाबळेश्वर) येथे जनसंवाद यात्रा मेळाव्यात ते बोलत होते. महाबळेश्वर परिसरातील तळदेव व कोयना खोऱ्यातील वळणे, आहिर, गाढवली या गावांतील त्यांनी नागरिकांशी संवाद साधला. कोयना खोऱ्यातील २२ गावांतील नागरिक महिलांनी जनसंवाद यात्रेचे स्वागत केले. यावेळी मतदारांनी विकासकामांबाबत गाऱ्हाणे मांडले. पुरुषोत्तम जाधव यांच्यासारखा सर्वसामान्य शेतकरी कुटुंबातील, गरिबीची जाण असलेला वारकऱ्यांचा मुलगा व जनतेत मिसळणारा लोकप्रतिनिधी आम्हाला हवा आहे, असे मत लोकांनी व्यक्त केले.

यावेळी शिवसेना महाबळेश्वर तालुकाप्रमुख संजय शेलार, मुख्यमंत्री लाडकी बहीण योजनेचे निमंत्रित सदस्य चंदू गुरुजी सपकाळ, लहुजी शक्ती सेना जिल्हाध्यक्ष बाळासाहेब जाधव, शिवसेना खंडाळा तालुकाप्रमुख भूषण शिंदे, पदाधिकारी व शिवसैनिक मोठ्या संख्येने उपस्थित होते. पुरुषोत्तम जाधव म्हणाले, मुख्यमंत्री एकनाथ शिंदे व खासदार श्रीकांत शिंदे यांच्या माध्यमातून कोयना व कांदाटी खोऱ्यात मोठा विकास निधी व आरोग्य सेवा पोहचल्या आहेत. अनेक कामे प्रगतीपथावर आहेत. या भागातील पर्यटनवाढीसाठी मुख्यमंत्री प्रयत्नशील असून दुर्गम भागातील युवकांना रोजगार उपलब्ध होण्यास मदत होणार आहे.

शिवसेनेचा महायुतीकडेमतदारसंघासाठी ‘दावा’
वाई विधानसभा मतदारसंघात विद्यमान आमदारांच्या विरोधात मतदारांचा प्रचंड रोष असून राष्ट्रवादी काँग्रेसच्या फुटीमुळे व शिवसेनेची या मतदारसंघावर असलेली पकड यांसह मुखमंत्र्यांचे मूळ गाव याच मतदारसंघात असल्याने या मतदारसंघावर शिवसेनेने दावा केला आहे.