Satara District Bank Election – सातारा जिल्हा मध्यवर्ती सहकारी बँकेच्या निवडणुकीसाठी आर्वी (ता. कोरेगाव) आणि शहापूर (ता. कराड)या दोन्ही सोसायट्यांचे जिल्हा बँकेसाठीचे ठराव घोरपडे गटाच्या बाजूने झाल्याने माजी मंत्री बाळासाहेब पाटील गटाला धक्का बसल्याची चर्चा राजकीय वर्तुळात सुरू आहे. आर्वी विकास सेवा सोसायटीमध्ये जिल्हा बँकेच्या ठरावावरून गेल्या काही दिवसांपासून राजकीय हालचालींना वेग आला होता.

सोसायटी निवडणुकीनंतर राष्ट्रवादी काँग्रेस व भाजपच्या सदस्यांच्या सहकार्याने संचालक मंडळाची स्थापना झाली होती. अध्यक्षपदी पवन जाधव तर उपाध्यक्षपदी मिराबाई जगदाळे यांची निवड झाली होती. मात्र, जिल्हा बँकेच्या ठरावाच्या पार्श्वभूमीवर काही संचालक आमदार मनोज घोरपडे यांच्या नेतृत्वाखाली काम करण्याच्या भूमिकेवर ठाम राहिले. त्यानंतर झालेल्या बैठकीत बाळासाहेब जाधव यांच्या नावाने ठराव बिनविरोध मंजूर करण्यात आला.

दरम्यान, कराड तालुक्यातील शहापूर विकास सेवा सोसायटीतही नाट्यमय घडामोडी घडल्या. सातारा जिल्हा मध्यवर्ती बँकेसाठीचा ठराव सोसायटीचे अध्यक्ष सर्जेराव चव्हाण यांच्या नावे 8 विरुद्ध 4 मतांनी मंजूर झाला. त्यामुळे गेल्या काही दिवसांपासून आमदार घोरपडे गटाने केलेल्या नियोजनबद्ध मोर्चेबांधणीला यश मिळाल्याचे मानले जात आहे. या प्रक्रियेत स्थानिक पदाधिकारी व कार्यकर्त्यांनी महत्त्वाची भूमिका बजावल्याचे सांगितले जात आहे.

दोन्ही गावांतील ठरावांमुळे जिल्हा बँक निवडणुकीच्या पाश्वर्र्भूमीवर आमदार मनोज घोरपडे गटाचे बळ वाढले आहे. विशेष म्हणजे शहापूर येथे ठराव मंजूर झाल्यानंतर सोसायटीचे पदाधिकारी व सदस्यांनी आमदार घोरपडे यांची भेट घेऊन त्यांच्या नेतृत्वावर विश्वास व्यक्त केला. काही सदस्यांनी भारतीय जनता पक्षात प्रवेश करत आगामी काळात गावाच्या विकासासाठी आमदार घोरपडे यांच्या सोबत राहण्याचा निर्धार व्यक्त केला.