प्रभात वृत्तसेवा सासवड – नगरविकास राज्यमंत्री माधुरी मिसाळ, जिल्हाधिकारी जितेंद्र डुडी, माजी आमदार संजय जगताप आणि भाजपा नेते बाबा जाधवराव यांच्या प्रमुख उपस्थितीत पुणे येथे गुरूवारी (दि.९) सासवड, जेजुरी आणि नवनिर्मित फुरसुंगी-उरुळी देवाची नगरपालिकांमधील रखडलेल्या विकासकामांचा सविस्तर आढावा घेण्यात आला. रस्ते, पाणीप्रश्न, घनकचरा व्यवस्थापन आणि कर्मचारी कमतरता यांसारख्या महत्त्वाच्या आणि मूलभूत सुविधांबाबत चर्चा झाली. या बैठकीत माजी आमदार संजय जगताप यांनी सासवड व जेजुरीची भुयारी गटार योजना, पाणी पुरवठा योजना, १५ वा वित्त आयोगाचा निधी, बांधकामांचे निकष कमी करणे, जेजुरीची हद्दवाढ तसेच कर आकारणी, नागरिकांच्या समस्या आणि निधीची कमतरता यावर राज्यमंत्री माधुरी मिसाळ आणि जिल्हाधिकारी जितेंद्र डुडी यांचे लक्ष वेधले. फुरसुंगी-उरुळी देवाची नगरपालिकेच्या व्यवस्थापनातील अडचणींवर आणि नागरिकांच्या मुलभूत सोयीसुविधांबाबत चर्चा झाली. जेजुरी नगरपालिकेत चाळीसगाव येथून आलेल्या क आणि ड वर्ग कर्मचाऱ्यांचे जवळच्या नगरपालिकेत स्थलांतर करण्याबाबत चर्चा होऊन स्थानिक कर्मचाऱ्यांना प्राधान्य देण्याच्या मागणीवरही चर्चा झाली. यामध्ये, फुरसुंगी नगरपालिकेतील कर्मचारी कमतरतेचा प्रश्न तातडीने सोडवा, १५ वा वित्त आयोग तसेच स्वच्छ भारत योजनेचा याबरोबरच पीएमआरडीए आणि पुणे महापालिकेने निधी देण्याची मागणी करण्यात आली. तातडीने उपाययोजना करण्याच्या सूचना.. नगरविकास राज्यमंत्री माधुरी मिसाळ आणि जिल्हाधिकारी जितेंद्र डुडी यांनी या बैठकीत झालेल्या सर्व महत्त्वाच्या चर्चा आणि समस्यांची नोंद घेत लवकरच सर्व प्रश्न मार्गी लावण्याचे आश्वासन दिले. प्रशासकीय पातळीवर आवश्यक असलेल्या निधीची पूर्तता करण्यासोबतच नागरिकांना उत्तम सोयीसुविधा देण्यासाठी तातडीने उपाययोजना करण्याच्या सूचना त्यांनी संबंधित अधिकाऱ्यांना दिल्या. या आढावा बैठकीला माजी आमदार संजय जगताप, भाजपा नेते बाबा जाधवराव यांच्यासह सासवडचे माजी नगराध्यक्ष मार्तंड भोंडे, जेजुरीच्या माजी नगराध्यक्षा विणा सोनवण, अजिंक्य देशमुख, यांसह माजी उपनगराध्यक्ष यशवंतराव जगताप, सुहास लांडगे, मनोहर जगताप, संदीप जगताप, विजय वढणे, भाजपाचे सचिन पेशवे, मयूर जगताप, साकेत जगताप, आनंद जगताप, डाॅ. सुमित काकडे, भारत चौखंडे, हेमंत सोनवणे, विश्वजीत आनंदे, हिरामण हिवरकर, संतोष गिरमे, तुषार जगताप, दोन्ही नगरपरिषदांचे माजी नगरसेवक आणि भाजपाचे पदाधिकारी उपस्थित होते.
