Sarfaraz Khan Takes Stunning Diving Catch Ranji Trophy Musheer Khan Bowling : देशांतर्गत क्रिकेटमध्ये आपल्या तुफानी फलंदाजीने वर्चस्व गाजवणारा मुंबईचा स्टार खेळाडू सर्फराझ खानने यावेळी आपल्या अफलातून क्षेत्ररक्षणाने सर्वांना थक्क केले आहे. क्रिकेट क्लब ऑफ इंडिया (CCI) येथे रेल्वेविरुद्ध झालेल्या रणजी करंडक सामन्यात सर्फराझने पहिल्या स्लिपमधून यष्टीरक्षकाच्या मागून धावत जात लेग स्लिपमध्ये हवेत झेप घेत एक अद्भूत झेल टिपला. त्याच्या या चित्तथरारक चपळाईमुळे मुंबईला अत्यंत मोक्याच्या क्षणी महत्त्वाची विकेट मिळाली असून, या अप्रतिम झेलचा व्हिडीओ सध्या सोशल मीडियावर तुफान व्हायरल होत आहे.

भावाच्या फिरकीवर सर्फराझची हवेत झेप; १६७ धावांची भागीदारी मोडली

रेल्वेकडून शतकी खेळी करणारा डावखुरा फलंदाज इशान गोयल हा मुशीर खानच्या फिरकीवर स्वीप फटका खेळण्याचा प्रयत्न करत होता. मात्र, चेंडू बॅटची कड घेऊन लेग साइडला हवेत उडाला. पहिल्या स्लिपमध्ये उभ्या असलेल्या सर्फराझने क्षणाचाही विलंब न लावता चेंडूचा अचूक वेध घेतला आणि काही सेकंदांत मोठे अंतर पार करत लेग स्लिपच्या दिशेने हवेत झेप घेतली. विशेष म्हणजे गोलंदाजी करणारा मुशीर खान हा सर्फराझचा सख्खा लहान भाऊ आहे. या दोघांच्या जुगलबंदीमुळे इशान आणि झुबेर अली यांच्यातील सहाव्या विकेटसाठीची १६७ धावांची धोकादायक भागीदारी संपुष्टात आली.

रेल्वेचा डाव गडगडला; मुंबईचा १०६ धावांनी दिमाखदार विजय

 

View this post on Instagram

 

मुशीरने ही महत्त्वपूर्ण जोडी फोडल्यानंतर रेल्वेची फलंदाजी पत्त्यांच्या बंगल्यासारखी कोसळली. मुंबईने या सामन्यात रेल्वेवर १०६ धावांनी दणदणीत विजय मिळवला. आयपीएलमध्ये चेन्नई सुपर किंग्स (CSK) कडून खेळणाऱ्या सर्फराझच्या या अविश्वसनीय झेलचे कौतुक करत सीएसके फ्रँचायझीनेही आपल्या अधिकृत सोशल मीडिया अकाउंटवरून हा व्हिडीओ शेअर केला आहे, ज्याला चाहत्यांकडून प्रचंड पसंती मिळत आहे.

हेही वाचा – Andre Russell Record : आंद्रे रसेलचा वर्ल्ड रेकॉर्ड! टी-२० क्रिकेटच्या इतिहासात हा पराक्रम करणारा ठरला जगातील पहिलाच खेळाडू

फिटनेसची उत्तरे मैदानातून; टीम इंडियात पुनरागमनाचे वेध

गेल्या काही काळापासून भारतीय संघाबाहेर असलेल्या सर्फराझने देशांतर्गत क्रिकेटमध्ये धावांचा पाऊस पाडणे सुरूच ठेवले आहे. त्याच्या फिटनेसवर सातत्याने टीका झाल्यानंतर त्याने वजन कमी करून फिटनेसवर कठोर मेहनत घेतली होती. आता केवळ फलंदाजीच नव्हे, तर अशा विश्वस्तरीय क्षेत्ररक्षणाच्या जोरावर त्याने आपण किती चपळ आणि तंदुरुस्त आहोत हे दाखवून दिले आहे. या कामगिरीच्या जोरावर सर्फराझ पुन्हा एकदा भारतीय संघाचे दरवाजे ठोठावत आहे.