पिंपळे गुरव: “हाती घेऊनी मृदुंग आणि टाळ, मुखी जपती हरिनाम” असा हरिनामाचा गजर करीत, पंढरीच्या दिशेने निघालेल्या संत तुकाराम महाराज पालखी सोहळ्याच्या निमित्ताने दापोडी, कासारवाडी आणि फुगेवाडी भागातील वारकरी आणि त्यांच्या सेवेसाठी समर्पित भाविकांचा “संत तुकाराम गौरव सन्मान पुरस्कार २०२५” ने सन्मान करण्यात आला.

या वारीदरम्यान पायी चालणाऱ्या वारकऱ्यांना मदत करणाऱ्या ह.भ.प. माणिक महाराज काळभोर, ह.भ.प. यशवंत महाराज बोधे, ह.भ.प. चंद्रकांत महाराज सोनवणे, ह.भ.प. शिवाजी महाराज काटे, डॉ. जितू परमार, अमिदा शेख, सीमा यादव, संजय लांडगे, आरोग्य विभागातील सतीश घोलप, मनीषा डोळस, सविता जाधव व आनंद कांबळे यांच्या कार्याची दखल घेत त्यांचा विशेष सत्कार करण्यात आला.

श्री अक्कलकोट स्वामी समर्थ ट्रस्टचे अध्यक्ष संजय कणसे, ह.भ.प. शांताराम बाईत प्रतिष्ठानचे रवींद्र बाईत, शोभा पगारे यांच्या हस्ते या मान्यवरांचा शाल, श्रीफळ आणि सन्मानचिन्ह देऊन गौरव करण्यात आला. कार्यक्रमाचे सूत्रसंचालन सागर शिवले यांनी केले, तर आभार मंगेश मोरे यांनी मानले.