छत्रपती संभाजीनगर : काही दिवसांपूर्वी कधी संधी मिळाल्यास उद्धव ठाकरे आणि एकनाथ शिंदेंना एकत्र आणण्याचा आपण प्रयत्न करणार असल्याचे मोठं वक्तव्य शिवसेना शिंदे गटाचे नेते संजय शिरसाट यांनी केले होते. त्यांच्या या वक्तव्यावर भाजप नेते आणि मत्स्य विकास मंत्री नितेश राणे यांनी संजय शिरसाट यांनी मध्यस्थी करण्याआधी एकनाथ शिंदे आणि त्यांच्या आमदारांची मते जाणून घ्यावी, असा सल्ला दिला होता. यावर आता संजय शिरसाट यांनी प्रतिक्रिया दिली आहे.

काय म्हणाले संजय शिरसाट ?
नितेश राणेंच्या एवढ्या मला शुभेच्छा मिळाल्या त्याची मला काळजी घ्यावी लागेल, त्यांनी पहिल्यांदाच सूचना केली आहे म्हणून त्यावर मी भाष्य करणार नाही. मी इशारा देत नाही आणि नितेश राणे इशारा देणाऱ्यातले नाही. अशी प्रतिक्रिया संजय शिरसाट यांनी दिली आहे.

नितेश राणे काय म्हणाले?
भाजप नेते आणि मत्स्य विकास मंत्री नितेश राणे यांनी संजय शिरसाट यांनी मध्यस्थी करण्याआधी एकनाथ शिंदे आणि त्यांच्या आमदारांची मते जाणून घ्यावी, असा सल्ला दिला होता. दरम्यान संजय शिरसाट आमचे मित्र आहे त्यांचा संजय राजाराम राऊत होऊ नये इतकीच अपेक्षा असे नितेश राणे म्हणाले.

आदित्य ठाकरेंवर टीका
बाळासाहेब ठाकरेंचं जे स्मारक होत आहे तो मराठी माणसाचा स्वाभिमान आहे. त्यांच्यापासून प्रेरणा घेऊन आमच्यासारखे लोक उभे राहिले आहेत. परंतु त्याची इंग्लिश मध्ये माहिती तयार करून कदाचित त्यांना ती लंडनला पाठवायची असेल, त्यासाठी त्यांचा प्रयत्न असल्याची टीका संजय शिरसाट यांनी आदित्य ठाकरे यांच्यावर केली आहे.