Sanjay Raut : शिवसेना ( ठाकरे गट ) खासदार संजय राऊत यांनी  काही दिवसांपूर्वी भाजपचे प्रदेशाध्यक्ष चंद्रशेखर बावनकुळे यांचा एक फोटो ट्विट करून एकाच गोंधळ निर्माण केला होता. त्यानंतर भाजप आणि शिवसेनेकडून एकमेकांवर आरोप-प्रत्यारोप होताना दिसून आले.  दरम्यान, आता पुन्हा एकदा संजय राऊत यांनी चंद्रशेखर बावनकुळे यांना डिवचण्याचा प्रयत्न केला आहे.

संजय राऊत यांनी सहा सेकंदाचा एक व्हिडीओ ट्विटरवर शेअर केला आहे. त्यावर ‘पिक्चर अभी बाकी है’ असे लिहित संजय राऊतांनी बावनकुळेंना सूचक इशारा दिला आहे.

अशात आता भाजप नेते नारायण राणे यांनी  माध्यमांशी बोलतांना यांनी संजय राऊत, आदित्य ठाकरे यासह मराठा आरक्षणाच्या मुद्द्यांवर भाष्य केले आहे. आदित्य ठाकरे आणि संजय राऊत यांच्यावर घणाघाती टीका केली आहे.

नारायण राणे म्हणाले,’संजय राऊत हा मानसिक रुग्ण असून तो डिप्रेशनमध्ये आहे. त्यामुळे अशा व्यक्तींवर न बोललेलेच बरे. संजय राऊत यांनी कधी जनहिताचे प्रश्न उपस्थित केले आहेत का? असा टोलाही राणे यांनी लगावला आहे.

दरम्यान,दोन दिवसांपूर्वी संजय राऊतांनी ‘एक्स’ अकाउंटवर चंद्रशेखर बावनकुळेंचा फोटो ट्वीट केला होता. ‘महाराष्ट्र पेटलेला आहे… आणि हे महाशय मकाऊ येथे कॅसिनोत जुगार खेळत आहेत. फोटो झूम करुन पहा… ते तेच आहेत ना?’ असे ट्वीटवर संजय राऊतांनी लिहिले होते. तसेच, माझ्याकडे २७ फोटो आणि ५ व्हिडीओ आहेत. ते जर मी पोस्ट केले, भाजपाचे दुकान बंद होईल, अही संजय राऊतांनी म्हटले होते.

त्यानंतर  आज संजय राऊतांनी मकाऊमधील कॅसिनोतील सहा सेकंदाचा एक व्हिडीओ ट्वीट केला आहे. यात एक व्यक्ती कॅमेरा घेऊन चालत आहे. आजूबाजूला अनेक लोक खुर्चीवर बसलेली दिसत आहे. त्यामुळे व्हिडीओत काय आहे? हे अद्याप समोर आलं नाही. “मकाऊ की रातें… पिक्चर अभी बाकी है,” असे फोटोला कॅप्शन संजय राऊतांनी दिले आहे.

दरम्यान, संजय राऊतांच्या आरोपांवर चंद्रशेखर बावनकुळेंनी बुधवारी ( २२ नोव्हेंबर ) भाष्य केलं होतं. “फोटोच्या आधारे कुणाचीही प्रतिमा मलिन करता येत नाही. कुणी हा प्रयत्न केला असेल, तर त्याला लखलाभ आहे. गेल्या ३४ वर्षांपासून राजकीय आणि सामाजिक क्षेत्रात आहे. विधिमंडळात २० वर्षापासून आहे,” असे बावनकुळेंनी म्हटले होते.