Sunil Tatkare : राष्ट्रवादी काँग्रेस पक्षातील २० ते २२ आमदार फुटणार असल्याचा खळबळजनक दावा ठाकरे गटाचे खासदार संजय राऊत यांनी केला होता. त्यांच्या या दाव्याला आता राष्ट्रवादी काँग्रेसचे प्रदेशाध्यक्ष सुनील तटकरे यांनी जोरदार प्रत्युत्तर दिलं आहे. विधानसभा निवडणुकीपासून संजय राऊत यांचे मानसिक संतुलन ढासळले असल्याचं तटकरे यांनी म्हटलं आहे. तसेच राष्ट्रवादी काँग्रेस पक्षात कोणतीही फूट पडणार नसून सर्व आमदार एकसंध असल्याचं त्यांनी स्पष्ट केलं.

संजय राऊतांवर सुनील तटकरेंचा निशाणा

संजय राऊत यांच्यावर टीका करताना सुनील तटकरे म्हणाले की, “संजय राऊत हे ज्येष्ठ पत्रकार असून सामनाचे संपादक आहेत. त्यांच्याशी आपले सौहार्दपूर्ण संबंधही आहेत. मात्र, विधानसभा निवडणुकीपासून त्यांचे मानसिक संतुलन पूर्णपणे ढासळले आहे. काल्पनिक कथा रचणे, सकाळी एखादे नवे नॅरेटिव्ह समोर आणणे आणि दिवसभर त्यावर टीव्हीवर चर्चा घडवून आणणे, एवढेच काम आता त्यांच्याकडे उरले आहे.”

राष्ट्रवादीतील ४१ आमदार एकसंध 

राष्ट्रवादी काँग्रेसमधील आमदार फुटणार असल्याच्या दाव्यावर सुनील तटकरे म्हणाले “राष्ट्रवादी काँग्रेस पक्ष एकसंध असून ४१ आमदार सुनेत्रा पवार यांच्या नेतृत्वाखाली काम करत आहेत. त्यामुळे आमदार फुटण्याचा प्रश्नच उद्भवत नाही.”

विलीनीकरणाच्या चर्चांवरही भाष्य

राष्ट्रवादी काँग्रेसच्या विलीनीकरणाबाबत बोलताना तटकरे यांनी सुनेत्रा पवार यांच्या भूमिकेचा उल्लेख केला. सुनेत्रा पवार यांनी नुकत्याच घेतलेल्या पत्रकार परिषदेत, ‘ज्या वेळी जे काही असेल, त्या वेळी कळेल,’ असं म्हटलं होतं. त्यामुळे विलीनीकरणाबाबत सध्या कोणतेही ठोस तथ्य किंवा चर्चा असल्याचे आपल्याला वाटत नसल्याचे तटकरे यांनी सांगितलं.

SHIVPAL SINGH YADAV: ‘मुस्लिम असणे हीच आझम खान यांची चूक?’ ; तुरुंगातील भेटीनंतर शिवपाल यादवांचे वक्तव्य चर्चेत