Sanaswadi Kidnapping Case – सणसवाडी (ता. शिरूर) येथील एका १६ वर्षीय अल्पवयीन मुलाचे अपहरण करून त्याच्यावर अत्याचार केल्याची धक्कादायक घटना उघडकीस आली आहे. याप्रकरणी शिक्रापूर पोलिसांनी तपास चक्रे फिरवत आरोपी महिलेला गुजरात येथून अटक केली आहे. गरिमा रुपेश बिंद (वय २६, मूळ रा. उत्तर प्रदेश) असे अटक करण्यात आलेल्या आरोपी महिलेचे नाव आहे.

याबाबत मिळालेली माहिती अशी की, २४ मार्च रोजी सणसवाडी येथून एक अल्पवयीन युवक बेपत्ता झाल्याने शिक्रापूर पोलीस ठाण्यात अपहरणाचा गुन्हा दाखल करण्यात आला होता. त्याच दरम्यान सणसवाडीतून गरिमा बिंद ही परप्रांतीय महिला देखील बेपत्ता असल्याची तक्रार दाखल झाली होती.

या दोन्ही घटनांचा समांतर तपास करत असताना, या महिलेने गुजरातमध्ये एटीएममधून पैसे काढल्याची माहिती पोलिसांना मिळाली. त्यानुसार पोलीस उपनिरीक्षक वेरणनाथ मुत्तनवार, हवालदार दामोदर होळकर आणि महिला पोलीस शिपाई पल्लवी वाघोले यांनी गुजरातमध्ये जाऊन शोध घेतला असता, अपहरण झालेला युवक आणि महिला पोलिसांना मिळून आले.

पोलिसांनी दोघांना ताब्यात घेऊन शिक्रापूर येथे आणल्यानंतर, महिलेने युवकाचे अपहरण करून त्याच्यावर अत्याचार केल्याचे निष्पन्न झाले. पोलिसांनी या प्रकरणात बाल लैंगिक अत्याचाराचे (पोक्सो) कलम लावून महिलेला अटक केली आहे. पोलीस उपनिरीक्षक विजय मस्कर या प्रकरणाचा पुढील तपास करत आहेत. महिलाच आरोपी असल्याने या घटनेमुळे तालुक्यात मोठी खळबळ उडाली आहे.