मुंबई  – बॉलिवूडमध्ये अल्पावधीत प्रसिद्धी मिळवणाऱ्या अभिनेत्रींमध्ये जरीन खान हिचे नाव आवर्जून घेतले जाते. सलमान खानने तिला बॉलिवूडमध्ये संधी दिली आणि तिने अनेक चित्रपटांमध्ये बोल्ड सीन देऊन प्रेक्षकांचे लक्ष वेधले. जरीन ही केवळ अभिनेत्रीच नव्हे, तर मॉडेलही आहे. तिने २०१० मध्ये सलमान खानसोबत ‘वीर’ चित्रपटातून आपल्या करिअरची सुरुवात केली.

१४ मे १९८७ रोजी मुस्लिम पठाण (पश्तुन) कुटुंबात जन्मलेल्या जरीनला हिंदी, उर्दू, इंग्रजी, मराठी आणि पश्तो भाषा अवगत आहेत. लहानपणी तिला डॉक्टर व्हायचे होते, परंतु नंतर तिचा कल चित्रपटसृष्टीकडे वळला. सुभाष घई यांच्या फिल्म स्कूलमधून तिने अभिनयाचे धडे घेतले. सलमान खान आणि दिग्दर्शक अनिल शर्मा यांच्या ‘वीर’ चित्रपटासाठी जरीनची निवड झाली. स्क्रीन टेस्टनंतर तिला ही संधी मिळाली.

‘वीर’ चित्रपटासाठी जरीनने ८ किलो वजन वाढवले होते. हा चित्रपट बॉक्स ऑफिसवर यशस्वी ठरला नाही, परंतु जरीनच्या अभिनयाला संमिश्र प्रतिसाद मिळाला. सुरुवातीला तिची तुलना कॅटरिना कैफशी झाली. त्यानंतर ‘हेट स्टोरी ३’ आणि ‘अक्सर २’ या चित्रपटांमधील तिच्या बोल्ड सीनांनी तिला विशेष ओळख मिळवून दिली.

जरीनने अली फजलसोबत ‘प्यार मंगा है’ या गाण्यातही बोल्ड सीन दिले. २०१६ मध्ये ‘वजह तुम हो’ चित्रपटातील ‘माही वे’ गाण्यात ती दिसली. २०२१ मध्ये प्रदर्शित झालेल्या ‘हम भी अकेले तुम भी अकेले’ या चित्रपटात ती झळकली, जो दोन समलैंगिकांच्या प्रेमकथेवर आधारित आहे. जरीनच्या या प्रवासाने तिची बॉलिवूडमधील वेगळी ओळख निर्माण केली आहे.