मुंबई  – बॉलीवूड अभिनेता सलमान खानच्या घराबाहेर गोळीबार करणाऱ्या विक्की गुप्ता याने दावा केला आहे की, या प्रकरणात गँगस्टर लॉरेन्स बिश्नोईची कोणतीही भूमिका नव्हती. 14 एप्रिलच्या पहाटे दोन मोटारसायकलवरून आलेल्या व्यक्तींनी वांद्रे येथील खान याच्या गॅलेक्सी अपार्टमेंटबाहेर पाच राऊंड गोळीबार केला.

हा हल्ला बिश्नोई टोळीने केल्याचे सांगण्यात येत आहे. तपासादरम्यान गोळीबार करणाऱ्या व्यक्तीचे नाव विक्की कुमार गुप्ता असल्याचे समोर आले आहे. गोळीबार प्रकरणी मुंबई पोलिसांच्या गुन्हे शाखेने आतापर्यंत गुप्ता, सागरकुमार पाल, सोनूकुमार बिश्नोई, अनुजकुमार थापन, मोहम्मद रफिक चौधरी आणि हरपाल सिंग या सहा जणांना अटक केली आहे. तर थापनचा मृत्यू आत्महत्येने झाला, त्यामुळे त्याच्यावरील खटला रद्द करण्यात आला आहे.

गुप्ता याने विशेष न्यायालयासमोर जामीन अर्ज दाखल केला आहे आणि असा दावा केला आहे की तो खरेतर इलेक्ट्रॉनिक, प्रिंट आणि सोशल मीडियावरून लॉरेन्स बिश्नोईच्या चारित्र्याने प्रभावित झाला होता आणि लॉरेन्स बिश्नोईच्या तत्त्वांशी संलग्न होता. या प्रकरणात बिश्नोईला विनाकारण ओढण्यात आल्याचा दावा त्याने केला.

अर्जदाराला लॉरेन्स बिश्नोईचा कोणताही कॉल आला नाही किंवा कोणत्याही मध्यस्थाने अर्जदाराला लॉरेन्स बिश्नोईशी बोलण्यास प्रवृत्त केले नाही, त्याला सध्याच्या प्रकरणात चुकीच्या पद्धतीने सामील करण्यात आले आहे आणि त्याची कोणतीही भूमिका नाही असे विक्की गुप्ताने सांगितले.

याशिवाय, गुप्ता याने त्याच्या जामीन अर्जात दावा केला आहे की तो गरीब पार्श्वभूमीचा आहे, आणि बिहारच्या दुर्गम गावात राहतो, ज्यात योग्य नागरी पायाभूत सुविधा नाहीत. तो कर्जबाजारी होता, ज्यामुळे त्याला गुन्हा करण्यास प्रवृत्त केले. त्याचे वडील मजुरीचे तर आई शेतात काम करतात. तो विवाहित असून त्याला पत्नी आणि दोन मुले आहेत, असे जामीन याचिकेत दिले आहे.