Sai Pallavi: दक्षिणात्य चित्रपटसृष्टीतील लोकप्रिय अभिनेत्री साई पल्लवी (Sai Pallavi) सध्या तिच्या आगामी ‘रामायण’ चित्रपटामुळे चर्चेत आली आहे. या चित्रपटात ती सीतेची भूमिका साकारत आहे. मात्र, नुकत्याच एका व्हायरल व्हिडिओमुळे तिच्या कास्टिंगवर सोशल मीडियावर मोठी चर्चा सुरू झाली आहे. अलीकडेच ‘एक दिन’ या चित्रपटाच्या कार्यक्रमात साई पल्लवी उपस्थित होती. या कार्यक्रमात तिने चाहत्यांशी हिंदी भाषेत संवाद साधण्याचा प्रयत्न केला. मात्र, तिची हिंदी थोडी अडखळणारी आणि तुटक वाटल्याने काही सोशल मीडिया यूजर्सनी तिच्यावर टीका केली. काहींनी तर प्रश्न उपस्थित केला की, “जिला नीट हिंदी बोलता येत नाही, ती सीतेसारखी महत्त्वाची भूमिका कशी निभावणार?” Sai Pallavi या व्हिडिओनंतर इंटरनेटवर दोन गट तयार झाले. एक गट साई पल्लवीच्या विरोधात बोलत आहे, तर दुसरा गट तिच्या समर्थनात उभा आहे. टीका करणाऱ्या यूजर्सचे म्हणणे आहे की, इतक्या मोठ्या बजेटच्या चित्रपटात कलाकार निवडताना भाषा आणि संवाद कौशल्य महत्त्वाचे असते. काहींनी तर तिच्या हिंदीतील चुका दाखवत तिच्या अभिनय क्षमतेवरही प्रश्नचिन्ह उपस्थित केले. Sai Pallavi Sai Pallavi मात्र, अनेक चाहत्यांनी साई पल्लवीचे समर्थनही केले आहे. काहींचे म्हणणे आहे की, चित्रपटांमध्ये डबिंगचा वापर केला जातो, त्यामुळे भाषा ही मोठी अडचण ठरत नाही. तसेच हा चित्रपट विविध भाषांमध्ये प्रदर्शित होणार असल्याने तिच्या आवाजावर नंतर काम केले जाईल. एका यूजरने असेही म्हटले की, “रामायण ही कथा भाषेच्या पलीकडे आहे. कलाकाराची भूमिका समजून घेण्याची क्षमता महत्त्वाची असते, भाषा नव्हे.” याशिवाय, काही लोकांनी साई पल्लवीच्या साधेपणाचे आणि तिच्या निवडक भूमिकांचे कौतुक केले आहे. त्यांनी म्हटले की, साई पल्लवीने तिच्या करिअरमध्ये नेहमीच सोज्वळ आणि अर्थपूर्ण भूमिका साकारल्या आहेत. त्यामुळे ती सीतेसारख्या पवित्र आणि आदर्श पात्रासाठी योग्य निवड आहे. दरम्यान, ‘रामायण’ हा मोठ्या बजेटचा आणि महत्त्वाकांक्षी प्रोजेक्ट आहे. या चित्रपटाचे दिग्दर्शन नितेश तिवारी करत आहेत. चित्रपटात रणबीर कपूर रामाची भूमिका साकारणार आहेत, तर यश रावणाच्या भूमिकेत दिसणार आहेत. याशिवाय रवि दुबे, सनी देओल आणि रकुल प्रीत सिंह यांच्याही महत्त्वाच्या भूमिका आहेत. हा चित्रपट दोन भागांमध्ये प्रदर्शित होणार आहे. पहिला भाग 2026 च्या दिवाळीत, तर दुसरा भाग 2027 च्या दिवाळीत प्रेक्षकांच्या भेटीला येणार आहे. त्यामुळे या चित्रपटाबद्दल प्रेक्षकांमध्ये मोठी उत्सुकता आहे. सध्या मात्र साई पल्लवीच्या कास्टिंगवरून सुरू झालेली ही चर्चा सोशल मीडियावर जोर धरत आहे. अखेर, प्रेक्षकांचा अंतिम निर्णय चित्रपट प्रदर्शित झाल्यानंतरच स्पष्ट होणार आहे.
