Sai Pallavi: दाक्षिणात्य चित्रपटसृष्टीतील लोकप्रिय अभिनेत्री साई पल्लवी ही तिच्या नैसर्गिक अभिनयासाठी आणि साधेपणासाठी ओळखली जाते. गेल्या ११ वर्षांत तिने तमिळ, तेलुगू आणि मल्याळम चित्रपटसृष्टीत स्वतःची वेगळी ओळख निर्माण केली. मात्र, तिच्या बॉलीवूड पदार्पणाला अपेक्षित यश न मिळाल्याने आता तिच्या करिअरची जोरदार चर्चा सुरू झाली आहे. साई पल्लवीने २०१५ मध्ये ‘प्रेमम’ या मल्याळम चित्रपटातून अभिनय क्षेत्रात पाऊल ठेवले. पहिल्याच चित्रपटाने तिला प्रचंड लोकप्रियता मिळवून दिली. त्यानंतर ‘फिदा’, ‘लव्ह स्टोरी’, ‘श्याम सिंघा रॉय’, ‘गार्गी’ यांसारख्या चित्रपटांमधील तिच्या अभिनयाचे खूप कौतुक झाले. विशेष म्हणजे, ग्लॅमरपेक्षा अभिनयावर भर देणाऱ्या मोजक्या अभिनेत्रींपैकी साई पल्लवी एक मानली जाते. इतक्या वर्षांच्या कारकिर्दीत तिच्या चित्रपटांबद्दल फारशा नकारात्मक प्रतिक्रिया आल्या नव्हत्या. मात्र, नुकत्याच प्रदर्शित झालेल्या तिच्या पहिल्या हिंदी चित्रपटामुळे तिच्या नावावर पहिल्यांदाच फ्लॉपचा शिक्का बसल्याची चर्चा होत आहे. १ मे रोजी प्रदर्शित झालेल्या ‘एक दिन’ या चित्रपटातून साई पल्लवीने बॉलीवूडमध्ये पदार्पण केले. या चित्रपटात तिच्यासोबत जुनैद खान मुख्य भूमिकेत होता. पण चित्रपटाला प्रेक्षकांकडून फारसा प्रतिसाद मिळाला नाही. Sai Pallavi चित्रपटाबद्दल सोशल मीडियावर संमिश्र प्रतिक्रिया पाहायला मिळत आहेत. काही प्रेक्षकांनी साई पल्लवीच्या हिंदी उच्चारांवर आणि स्क्रीन प्रेझेन्सवर प्रश्न उपस्थित केले. तर काहींचे मत आहे की, दक्षिणेतील प्रेक्षकांनी ज्या पद्धतीने तिला स्वीकारले, तशी प्रतिक्रिया हिंदी प्रेक्षकांकडून मिळालेली नाही. स्वतः साई पल्लवीनेही एका मुलाखतीत आपली कास्टिंग कदाचित चुकीची ठरली असावी, असे सांगितले. आयएमडीबीच्या माहितीनुसार, साई पल्लवीच्या करिअरमध्ये आतापर्यंत फक्त एकच चित्रपट फ्लॉप ठरला होता. २०१९ मध्ये आलेला ‘एनजीके’ हा चित्रपट बॉक्स ऑफिसवर अपयशी ठरला होता. या चित्रपटात सूर्या आणि रकुल प्रीत सिंह मुख्य भूमिकेत होते. त्याशिवाय तिच्या बहुतांश चित्रपटांनी चांगली कमाई केली किंवा समीक्षकांची प्रशंसा मिळवली. तरीही साई पल्लवीच्या चाहत्यांचा तिच्यावरचा विश्वास कायम आहे. अनेक चाहत्यांचे म्हणणे आहे की, ती नेहमी आशयघन आणि दमदार भूमिका निवडते. तिचा खरा प्रभाव अभिनयातून दिसतो, केवळ ग्लॅमरस प्रतिमेतून नाही. दरम्यान, साई पल्लवी आता नितेश तिवारी यांच्या बहुचर्चित ‘रामायण’ चित्रपटात सीतेची भूमिका साकारताना दिसणार आहे. या चित्रपटात रणबीर कपूर, यश आणि सनी देओल यांसारखे मोठे कलाकारही आहेत. मोठ्या बजेटमध्ये तयार होत असलेल्या या चित्रपटाकडून प्रेक्षकांना खूप अपेक्षा आहेत. त्यामुळे साई पल्लवी पुन्हा एकदा यशाच्या शिखरावर पोहोचते का, याकडे सर्वांचे लक्ष लागले आहे.
