मॉस्को : युक्रेनविरोधात सुरू असलेल्या युद्धामध्ये इस्टर निमित्ताने रविवारी संध्याकाळी ६ वाजल्यापासून मध्यरात्रीपर्यंत युद्धबंदी पाळण्याची घोषणा रशियाचे अध्यक्ष ब्लादिमिर पुतीन यांनी केली आहे. युक्रेनने देखील याच प्रमाणे या कालावधीमध्ये युद्धबंदी पाळण्याची अपेक्षाही त्यांनी केली आहे. शनिवारी संध्याकाळी रशियाचे चीफ ऑफ जनरल स्टाफ जनरल गेरासिमोव्ह यांच्याबरोबरच्या बैठकीनंतर पुतीन यांनी ही घोषणा केली.

युक्रेनच्या सीमेजवळ जेथे युद्ध सुरू आहे, अशा दोन ठिकाणांव्यतिरिक्त संपूर्ण कुर्स्क प्रांतात ही युद्धबंदी पाळण्यात येईल, असे पुतीन यांनी म्हटले आहे. ज्या भागांमध्ये रशियाकडून युद्धबंदी पाळण्यात येणार आहे, ते भाग रशियाने ऑगस्ट २०२४ मध्येच ताब्यात घेतले आहेत. मात्र युक्रेनच्या सैन्याकडून हा भूभाग परत मिळवण्यासाठी जोरदार प्रयत्न केले जात आहेत.