मुंबई  – अमेरिकेने भारतावर जशास तसे म्हणजे रेसिप्रोकल पंचवीस टक्के आयात शुल्क लावलेले आहे. रशियाकडून तेल खरेदी केल्याबद्दल आणखी 25% आयात शुल्काची घोषणा केली आहे. याची अंमलबजावणी 27 ऑगस्ट पासून होणार आहे. अशा परिस्थितीत आयात करणार्‍यांनी डॉलरची मागणी वाढविल्यामुळे गेल्या आठवड्यापासून रुपयांच्या मूल्यावर दबाव येत आहे.

सोमवारी रुपयाचा दर सहा पैशांनी घसरून 87.58 रुपये प्रति डॉलर या पातळीवर गेला. याच कारणामुळे शुक्रवारी रुपयाचा भाव तब्बल 27 पैशांनी कोसळला होता. अमेरिकेच्या फेडरल रिझर्वचे अध्यक्ष जेरोम पॉवेल यांनी सप्टेंबरमध्ये व्याजदर कपातीची शक्यता व्यक्त केल्यामुळे डॉलर बळकट होत आहे. त्याचाही रुपयांच्या मूल्यावर नकारात्मक परिणाम होत आहे.

अशा परिस्थितीत रिझर्व बँकेला अनेक वेळा रुपयाचे मूल्य स्थिर ठेवण्यासाठी हस्तक्षेप करावा लागलेला आहे. दरम्यानच्या काळात भारताने रशियाकडून स्वस्त क्रुड उपलब्ध होत असल्यास ते खरेदी केले जाईल याचा पुनरुच्चार केला आहे. त्यामुळे अमेरिका आणि भारतादरम्यानचे व्यापारी संबंध आणखी बिघडत जाण्याची शक्यता वाढली आहे.

या घडामोडीचाही रुपयांच्या मूल्यावर लघु आणि मध्यम पल्यात परिणाम होण्याची शक्यता व्यक्त करण्यात येत आहे. दरम्यानच्या काळात शुक्रवारी परदेशी संस्था गुंतवणूकदारांनी 1,622 कोटी रुपयांच्या शेअरची विक्री केली. अशा परिस्थितीत आगामी पंधरवडा रुपयांच्या मूल्याच्या बाबतीत अतिशय महत्त्वपूर्ण ठरणार असल्याचे बर्‍याच विश्लेषकांनी या संदर्भात बोलून दाखविले. भारताकडे सध्या परकीय चलनाचा 693 अब्ज डॉलरचा साठा आहे.