Komal Rani Social Media Post : अभिनेता गोविंदा सध्या त्याच्या वैयक्तिक आयुष्यामुळे चर्चेत आहे. पत्नी सुनीता आहुजासोबतच्या नात्याबाबत विविध चर्चा सुरू असतानाच अभिनेत्री कोमल राणी स्वर्णकारसोबत त्याचे नाव जोडले जात आहे. दोघे रिलेशनशिपमध्ये असल्याच्या अफवाही सोशल मीडियावर रंगल्या आहेत. आता या चर्चांवर अखेर कोमल राणीने मौन सोडत सोशल मीडियावर सविस्तर पोस्ट शेअर केली आहे.

काही दिवसांपूर्वी गोविंदा आणि कोमल राणी यांनी लालबागच्या राजाचे एकत्र दर्शन घेतले होते. त्यांचे एकत्रित फोटो आणि व्हिडिओ सोशल मीडियावर व्हायरल झाल्यानंतर त्यांच्या नात्याबाबतच्या चर्चांना आणखी उधाण आले. यावर नाराजी व्यक्त करत कोमलने टीकाकारांना पोस्टमधून खडेबोल सुनावले आहे.

कोमलने आपल्या पोस्टमध्ये म्हटले की, काही सेलिब्रिटी गोविंदा आणि तिच्या वैयक्तिक आयुष्यावर तसेच त्यांच्या कामावर उघडपणे भाष्य करत आहेत. मात्र, दहशतवाद, राजकारण, एखाद्या अभिनेत्याचा मृत्यू किंवा इतर गंभीर विषयांवर त्याच प्रकारे ठाम भूमिका घेताना ते दिसत नाहीत. मग तिच्या आणि गोविंदाच्या वैयक्तिक आयुष्याबाबत प्रत्येकाला बोलण्याचा अधिकार का वाटतो, असा सवाल तिने उपस्थित केला.

पुढे ती म्हणाली “आम्ही एकत्र काम करत आहोत आणि यापुढेही एकत्र दिसू. जर कोणाला याचा त्रास होत असेल, तर त्यांचा जळपळाट होत असेल तर होऊ दे” असे मोठे वक्तव्य केल्याने याचा अर्थ दोघे रिलेशनमध्ये आहेत का असा सवाल उपस्थित केला जात आहे.

दरम्यान, गोविंदा आणि कोमल यांनी लालबागच्या राजाचे एकत्र दर्शन का घेतले, याचेही तिने स्पष्टीकरण दिले. त्यांच्या आगामी ‘रुपा’ या चित्रपटाच्या यशासाठी त्यांनी गणपती बाप्पाचे दर्शन घेतल्याचे कोमलने स्पष्ट केले.

Shantanu Moghe: ‘प्रियासारखी कोणीच नाही…’; प्रिया मराठेंच्या आठवणीत शंतनू मोघे भावूक