25 टक्‍के प्रवेशासाठी यंदा एकच सोडत निघणार 

पुणे – शिक्षण हक्‍क कायद्यानुसार राखीव जागांवरील 25 टक्‍के प्रवेशासाठी यंदा एकच सोडत निघणार आहे. प्राथमिक शिक्षण संचालनालयाने आरटीई प्रवेशाबाबतचे संभाव्य वेळापत्रक जाहीर केले आहे. आरटीई प्रवेशासाठी पात्रताधारक शाळांना 30 जानेवारीपर्यंत नोंदणीसाठी मुदत देण्यात आली आहे. 

आरटीईअंतर्गत दरवर्षी दुर्बल घटकातील 25 टक्के विद्यार्थ्यांना खासगी शाळांत प्रवेश दिला जातो. यंदा प्रवेशासाठी दि. 9 फेब्रुवारी 2021 पासून ऑनलाइन अर्ज करता येईल. दि. 9 ते 26 फेब्रुवारीदरम्यान पालकांना अर्ज करायचे आहे. पाच मार्चला जागांची सोडत निघेल. अर्ज निवडलेल्या पालकांनी 9 ते 26 मार्च दरम्यान कागदपत्रांची पडताळणी करायची आहे. त्यानंतर प्रतीक्षा यादी जाहीर होईल. प्रतीक्षा यादीतील विद्यार्थ्यांना चार टप्प्यांत प्रवेश घेता येईल.

यंदा एकच लॉटरी काढण्यात येणार असून शाळेच्या रिक्त जागेच्या संख्येइतकीच प्रतीक्षा यादी असेल. प्रतीक्षा यादी पूर्ण झाल्यावरही शाळेत जागा रिक्त असल्यास, अर्ज शिल्लक असल्यास पुन्हा सोडत काढून प्रवेश देण्यात येतील, असे प्राथमिक शिक्षण संचालनालयकडून स्पष्ट करण्यात आले आहे.

आरटीई संभाव्य वेळापत्रक
शाळांची नोंदणी-8 फेब्रुवारी
प्रवेश अर्ज भरणे -9 ते 26 फेब्रुवारी
ऑनलाइन सोडत -5 ते 6 मार्च
प्रवेश निश्‍चिती -9 ते 26 मार्च