Corruption News: ओडिशात भ्रष्टाचाराचे एक धक्कादायक प्रकरण उघडकीस आले असून खाण विभागाच्या उपसंचालकाला लाच घेताना रंगेहाथ पकडण्यात आले आहे. राज्याच्या दक्षता पथकाने मंगळवारी रात्री उपसंचालक देवव्रत मोहंती यांना अटक केली. त्यानंतर त्यांच्या भुवनेश्वरमधील सदनिकेत केलेल्या झडतीत ट्रॉली बॅगेत कोंबून ठेवलेल्या नोटांचे तब्बल ४ कोटी रुपये सापडले. मोहंती हे एका परवानाधारक कोळसा विक्रेत्याकडून व्यवसाय सुरळीत चालवून देण्याच्या बदल्यात ३० हजार रुपये लाच घेताना पकडले गेले. अटकेनंतर दक्षता पथकाने त्यांची भुवनेश्वरची सदनिका, भद्रक जिल्ह्यातील पैतृक घर आणि कटकमधील कार्यालय या तिन्ही ठिकाणांची एकाचवेळी झडती घेतली. हेही वाचा – राज्यातील शासकीय कर्मचाऱ्यांसाठी आनंदाची बातमी; महागाई भत्त्यात 3 टक्के वाढ जाहीर भुवनेश्वरच्या सदनिकेत ट्रॉली बॅगेतून ४ कोटी रुपये जप्त करण्यात आले, तर कार्यालयाच्या ड्रॉवरमधून १ लाख २० हजार रुपये रोख आढळले. याशिवाय भुवनेश्वरमध्ये एक दुमजली बंगला आणि सुमारे १३० ग्रॅम सोनेही जप्त करण्यात आले आहे. विशेष म्हणजे, या एकाच कारवाईने राज्याच्या भ्रष्टाचारविरोधी यंत्रणेचा आजवरचा विक्रम मोडला. यापूर्वी ७ एप्रिल २०२२ रोजी गंजाम जिल्ह्यात एका सहायक अभियंत्याच्या घरी ३.४ कोटी रुपये सापडले होते. भ्रष्टाचार प्रतिबंधक कायद्यांतर्गत गुन्हा दाखल करण्यात आला असून तपास सुरू आहे.