Maharashtra Politics |  महायुती सरकारवर निधी वाटपात दुजाभाव केला जात असल्याचा आरोप अनेकदा विरोधकांकडून करण्यात आला आहे. याचदरम्यान आता शिवसेना शिंदे गटाचे दादर-माहीम माजी आमदार सदा सरवणकर यांच्या वक्तव्यामुळे नवा वाद निर्माण होण्याची शक्यता आहे. विद्यमान आमदारांना विकासासाठी दोन कोटी रुपये मिळतात, पण मी आमदार नसताना मला 20 कोटी रुपये मिळाले, असा दावा माजी आमदार सदा सरवणकर यांनी केला आहे.

दादर-माहीम परिसरातील एका कार्यक्रमात भाषण करताना माजी आमदार सदा सरवणकर म्हणाले की, “मी आमदार नाही, याची मला पूर्ण कल्पना आहे. पण आमदार नसतानाही माझी कामे सुरू आहेत. प्रत्येक सोसायटी, प्रत्येक बिल्डिंगमध्ये मी कामे केली. मात्र माझा अनुभव असा आहे की काम करणाऱ्यांचा पराभव होतो आणि काम न करणारे जातीपातीवर निवडून येतात. मी कधीच पराभूत झालो असं वाटलं नाही, लोकांचं प्रेम माझ्यासोबत आहे.”

विद्यमान आमदारांना 2 कोटी रुपयांचा निधी आणि… 

ते पुढे म्हणाले, “मुख्यमंत्री आणि उपमुख्यमंत्री एकनाथ शिंदे माझ्यामागे खंबीरपणे उभे आहेत. त्यामुळे मी पराभूत नाही. माझा स्वभावच काम करण्याचा आहे, म्हणूनच तुम्ही मला सर्वत्र उद्घाटन करताना पाहता, या बांधकामासाठी आपल्याला परवानगी नव्हती. पण ती आपण मिळवली. देवेंद्र फडणवीस आणि एकनाथ शिंदे यांचे नेत्तृत्व आपल्याला लाभले आहे. विकासकामांसाठी विद्यमान आमदारांना 2 कोटी रुपयांचा निधी मिळतो. पण मी आमदार नसताना 20 कोटी रुपयांचा निधी मिळाला,” असे वादग्रस्त वक्तव्य सरवणकर यांनी केले. Maharashtra Politics |

दरम्यान, सरवणकर यांनी निधी वाटपाबाबत केलेल्या या विधानामुळे राजकीय वर्तुळात चर्चा रंगली आहे. याआधी देखील आमदारांना मिळणाऱ्या निधीवरून वाद झालेले असताना सरवणकर यांच्या विधानामुळे महायुती सरकारच्या अडचणीत आणखी वाढ होण्याची शक्यता आहे. Maharashtra Politics |

हेही वाचा: 

“भारत-पाकिस्तान युद्ध मी थांबवलं म्हणून मला नोबेल शांतता पुरस्कार…” ; ट्रम्पने पुन्हा एकदा युद्धबंदीचे श्रेय घेतले